Almaty-1 jáne Almaty-2 vokzaldary QTJ basqarýyna berildi: ne ózgeredi
ALMATY. KAZINFORM – Almaty-1 jáne Almaty-2 temir jol vokzaldary «Qazaqstan temir joly» ulttyq kompanııasyna qaıtaryldy.
2019 jyly Almaty-1 jáne Almaty-2 temirjol vokzaldary qalanyń kommýnaldyq menshigine ótti.
2023 jyly Almatynyń burynǵy ákimi Erbolat Dosaev temir jol vokzaldary «Qazaqstan temir joly» ulttyq kompanııasyna qaıtarylatyny týraly málimdedi.
Bıyl Kólik mınıstrligi vokzaldardy senimgerlik basqarýǵa berý boıynsha protsedýralar júrip jatqanyn habarlady.
Osy oraıda, Almatynyń qaqpasyna aınalǵan vokzaldardyń qazirgi jaı-kúıin bilý úshin «Qazaqstan temir joly» ulttyq kompanııasyna saýal joldadyq. QTJ jaýabyna sáıkes, 2025 jyldyń 16 shildesinen bastap Almaty-1 jáne Almaty-2 temirjol vokzaldary senimgerlik basqarýǵa qabyldanǵan.
Ulttyq kompanııa eki nysandy da jańǵyrtýdy josparlap otyr. Almaty-1 temirjol vokzalynyń ǵımaraty jóndeýden ótedi.
– Óz kezeginde, tarıhı jáne mádenı eskertkish sanalatyn Almaty-2 temirjol vokzalynyń ǵımaraty Qazaqstan Respýblıkasynyń tarıhı-mádenı mura obektilerin qorǵaý jáne paıdalaný salasyndaǵy zańnamasynyń talaptaryna sáıkes restavratsııalanýǵa jatady. Atalǵan jumystar josparǵa engizilgen jáne barlyq normatıvtik talapty saqtaı otyryp júzege asyrylady, - dep habarlady QTJ.
Kompanııanyń málimetinshe, bul jobalar obektilerdiń paıdalaný merzimin uzartýǵa, sondaı-aq olardyń tehnıkalyq jaı-kúıi men fýnktsıonaldyq maqsatyn zamanaýı talaptarǵa sáıkestendirýge baǵyttalǵan. Biraq jóndeý jumystaryn júrgizýdiń merzimi áli naqtylanbaǵan.
– Jumystardyń túpkilikti kólemi men quramy zańnamada belgilengen tártippen ázirlengen jobalaý-smetalyq (ǵylymı-jobalyq) qujattama boıynsha memlekettik saraptama nátıjeleri boıynsha aıqyndalady, - delingen jaýapta.
Aıta ketken jón, búgingi kúni Almaty-1 vokzalynda 80 adam, al Almaty-2 vokzalynda 47 adam jumys isteıdi. Vokzaldardy kútip ustaý úshin qosymsha jekemenshik kompanııanyń Almaty-1 vokzaly boıynsha 36 adamy, Almaty-2 vokzalynda 30 adamy qyzmet kórsetedi.
Eske salaıyq, buǵan deıin Almaty-1 temirjol vokzalynyń janynda jańa Arbat ashylatynyn jazǵanbyz.