Almaty-1 vokzalyn jańǵyrtý jumystary qalaı júrip jatyr

Almaty ákimdiginiń málimetinshe, qazir vokzalda qurylys-montaj jumystarynyń 75%-y oryndalǵan. Joba aıasynda vokzal keshendi jańartylyp, jolaýshylar úshin barynsha jaıly jaǵdaı jasalmaq.

- 1976 jyly salynǵan vokzal táýligine 6 myńnan astam jolaýshyǵa qyzmet kórsetedi. Sońǵy jańartý 2007 jyly júrgizilgen, - dep atap ótti ákimdikten.

Temirjol nysanynda jóndeý jumystary byltyr bastaldy. Ǵımarat pen perronnyń tehnıkalyq jaı-kúıine júrgizilgen tekserý nátıjesine sáıkes, nysannyń qurylymdaryn kúsheıtý jáne zamanaýı jaılylyq pen qaýipsizdik standarttaryna sáıkes jańartý qajet ekeni anyqtaldy.

Bıyl mamyr aıynda Premer-mınıstrdiń birinshi orynbasary Nurlybek Nálibaev Almaty qalasyna jumys sapary barysynda vokzaldaǵy jumystardyń qarqynyn synǵa alǵan bolatyn.

— Úkimet basshysynyń Almaty-1 vokzalyndaǵy jańǵyrtýdyń barysyn kórý tapsyrmasymen kelgende, «Qazaqstan Temir jolynyń» jumysyndaǵy kemshilikterdi baıqadyq. Vokzalǵa jaz mezgilinde táýligine 12 myń, al qysta 7 myńǵa jýyq jolaýshy kelip-ketedi. Qazir olarǵa jyl on eki aı qolaısyz jaǵdaı týyndaǵan. Josparlanǵan jumys sońyna jetpeı, jolaýshylar qıyndyq kórýde. Alyp shaharda ornalasqan asa mańyzdy nysandaǵy jumys qarqyny múldem syn kótermeıdi. Jazǵy demalys maýsymy bastalatyn ýaqyt boldy. Sondyqtan jumysty jedeldetý kerek, — dedi Premer-mınıstrdiń birinshi orynbasary.

Eske salaıyq, 2019 jyly Almaty-1 jáne Almaty-2 temirjol vokzaldary qalanyń kommýnaldyq menshigine ótti.

Alaıda 2025 jyldyń shildesinen bastap Almaty-1 jáne Almaty-2 temirjol vokzaldary «Qazaqstan temir joly» ulttyq kompanııasyna senimgerlik basqarýǵa berildi.