Almaty-1 vokzaly júk bólimshesiniń qyzmetkerlerine is qozǵaldy

ALMATY. KAZINFORM — «Jolaýshylar tasymaly» AQ «Ońtústik» fılıalynyń qyzmetkerlerine qatysty sotqa deıingi tergeý júrip jatyr.

Kóliktegi polıtsııa departamentiniń málimetinshe, qylmystyq is — aldaý nemese senimdi teris paıdalaný arqyly múliktik zalal keltirý ((QR QK 195-babynyń 5-bóligi) faktisi boıynsha qozǵalǵan.

— Qazirgi ýaqytta oqıǵanyń mán-jaıyn anyqtaýǵa baǵyttalǵan qajetti tergeý amaldary júrgizilip jatyr. Qazaqstan Respýblıkasy Qylmystyq-protsestik kodeksiniń 201-babyna sáıkes ózge aqparat jarııa etýge jatpaıdy, — dep habarlady departament.

Al «Jolaýshylar tasymaly» AQ basqarma tóraǵasy Dııar Núsipqojanov tergeý Almaty-1 temir jolynyń júk bólimshesiniń qyzmetkerlerine qatysty júrgizilip jatqanyn naqtylady.

Onyń aıtýynsha, kompanııa ishki ister organdaryna tolyq qoldaý kórsetip, júk tasymaly salasynda keshendi tekserýler júrgizip jatyr. 2025 jyldyń qyrkúıeginde júrgizilgen ishki qyzmettik tergeý qorytyndysy boıynsha júk bólimshesi qyzmetkerleriniń birimen eńbek sharty buzylǵan. Odan bólek, birneshe qyzmetker men basshy tártiptik jaýapkershilikke tartylǵan. Onyń ishinde: júk pen bagaj qabyldap-tapsyrýshy, «Ońtústik» fılıaly dırektorynyń júk tasymaly jónindegi orynbasary, Ońtústik óńirlik ýchaskesiniń bastyǵy — júk tasymalyn uıymdastyrý bóliminiń bastyǵy, sondaı-aq júk bólimshesiniń meńgerýshisi bar.

Kompanııa basshysy qazirgi ýaqytta júkti rásimdeý jáne tasymaldaý protsesteriniń ashyqtyǵyn arttyrý úshin tsıfrlyq sheshimder engizilip jatqanyn atap ótti. Qoıma shtattyq rejımde jumys istep tur.

Eske salaıyq, buǵan deıin Kólik mınıstrligi Almaty-1 temirjol vokzalynyń jańarǵan jobasyn jarııalady.