«Almaty-1» vokzaly mańynda er adam óz-ózine qol jumsamaq boldy
ASTANA. KAZINFORM — «Almaty-1» temirjol vokzaly mańynda ózine qol jumsamaq bolǵan er adamdy arnaıy jedel áreket etý jasaǵynyń qyzmetkerleri aman alyp qaldy.
Polıtsııa málimetinshe, oqıǵa týraly habar ótip bara jatqan azamattan túsken. Oqıǵa ornyna dereý jetken tártip saqshylary qolynda pyshaǵy bar er adamdy anyqtaǵan.
Ol shatasqan kúıde bolǵan jáne áreketiniń sebebin túsindire almaǵan. Jedel áreket etý jasaǵy er adamnyń ózine qol jumsaýynyń aldyn alyp, aınaladaǵy azamattardyń qaýipsizdigin qamtamasyz etti.
«Bizdiń qyzmetkerler barynsha jyldam ári saq qımyldady. Eń bastysy, adam ómirin saqtaý. Azamattyń qyraǵylyǵy men jedel áreketimizdiń arqasynda qaıǵyly jaǵdaı bolmady», - dedi Almaty qalalyq PD jasaǵynyń komandıri Azamat Isergýjın.
Er adam dárigerlerge tapsyrylyp, psıhologııalyq jáne medıtsınalyq kómek kórsetildi.
Polıtsııa azamattarǵa ómir men densaýlyqqa qaýip tóngen kez kelgen jaǵdaıda birden «102» nómirine habarlasýdy eske saldy.
Buǵan deıin Almaty halyqaralyq áýejaıynda 33 jastaǵy er adamnyń ózin órtemek bolǵan áreketi boıynsha tergeý qylmystyq quram bolmaǵandyqtan toqtatylǵany habarlanǵan edi.