Almashan Smatlaev Almaty ákiminiń birinshi orynbasary bolyp taǵaıyndaldy

ALMATY. KAZINFORM — Almashan Smatlaev Almaty ákiminiń birinshi orynbasary qyzmetine taǵaıyndaldy. Tıisti ókimge qala ákimi Darhan Satybaldy qol qoıdy.

Qala ákimdiginiń baspasóz qyzmetiniń habarlaýynsha, bul kadrlyq sheshim Qazaqstan Respýblıkasy Prezıdenti Ákimshiligimen kelisilgen.

— Jańa qyzmetinde Almashan Smatlaev kóriktendirý, energetıka jáne turǵyn úı-kommýnaldyq sharýashylyq, kólik jáne jol máselelerine jetekshilik etedi, - delingen habarlamada.

Almashan Smatlaev Reseı Federatsııasyndaǵy Qarjy ýnıversıtetin «ekonomıka» jáne «memlekettik jáne mýnıtsıpaldyq basqarý» mamandyqtary boıynsha, sondaı-aq, AQSh-taǵy Blýmsberg ýnıversıtetin «halyqaralyq ekonomıka» mamandyǵy boıynsha támamdaǵan.

Eńbek jolyn 2009 jyly bıznes qurylymdarda bastap, keıin Eýrazııalyq ekonomıkalyq komıssııada jumys istedi.

2014-2023 jyldar aralyǵynda Shyǵys Qazaqstan oblysynda ekonomıka jáne bıýdjettik josparlaý basqarmasyn basqardy, oblys ákiminiń orynbasary, keıin birinshi orynbasary sııaqty ártúrli laýazymda qyzmet atqardy.

Qazaqstan Respýblıkasy Prezıdenti Ákimshiliginiń memlekettik ınspektory bolyp eńbek etken.

Eske salaıyq, 2025 jylǵy 18 tamyzda Almashan Smatlaev Almaty ákiminiń orynbasary bolyp taǵaıyndalǵan edi.