Almasbek Sadyrbaıǵa qatysty tergeý aıaqtaldy

QONAEV. KAZINFORM – Almaty oblysynda Almasbek Sadyrbaı men onyń alty seriktesine qatysty alaıaqtyq, qylmystyq kiristerdi zańdastyrý jáne uıymdasqan qylmystyq topqa qatysý faktileri boıynsha qylmystyq is tergelýi aıaqtaldy.

Oblystyq prokýratýranyń habarlaýynsha, vedomstvolararalyq tergeý toby osy jyly 20 maýsymda tergeýdi tolyq aıaqtaǵan.

— Tergeý Qazaqstan Respýblıkasynyń Qylmystyq kodeksiniń 190-babynyń 4-bólimi 2 tarmaǵy, 218-babynyń 1-bólimi, 262-babynyń 1 jáne 2-bólimi boıynsha júrgizildi (asa iri mólsherdegi alaıaqtyq, qylmystyq jolmen alynǵan aqshany zańdastyrý jáne uıymdasqan qylmystyq top qurý jáne oǵan qatysý). Barlyǵy 27 epızod tirkelgen. Іs 349 tomnan turady, onyń 182 tomy tergeý materıaldary, al 167 tomy – qujattyq jáne zattaı dálelder, - dep habarlady vedomstvo.

20 maýsym men 15 qyrkúıek aralyǵynda is materıaldarymen zardap shekken oblystyq aýyl sharýashylyǵy basqarmalarynyń tórt ókili tanysty. 15 qyrkúıekten bastap jeti kúdikti men olardyń toǵyz qorǵaýshysy is materıaldarymen tanysyp jatyr.

Prokýratýranyń málimetinshe, qamaýda otyrǵan Almasbek Sadyrbaı ýaqytsha ustaý ızolıatorynda 108 tomdy qaraǵan. Tergeý protsesi áli de jalǵasyp jatyr, ol jeltoqsan aıynyń ortasynda aıaqtalýy múmkin.

Eske salaıyq, 2024 jylǵy qarashada Almasbek Sadyrbaı 189-bap boıynsha qamaýǵa alynǵan edi.

Keıinirek Bas prokýratýra Kazinform saýalyna joldaǵan jaýapta sýbsıdııa shemasymen 1,2 mlrd teńge jymqyrdy degen kúdikke ilingen «Shańyraq» qoǵamdyq birlestiginiń basshysy Almasbek Sadyrbaıdyń isi nege Qarjylyq monıtorıng agenttiginen arnaıy prokýrorlarǵa ótkenin túsindirdi.