Almasbek Sadyrbaıdyń ústinen taǵy bir qylmystyq is qozǵalǵan — Qarjylyq monıtorıng agenttigi

ASTANA. KAZINFORM — Qarjylyq monıtorıng agenttigi tóraǵasynyń orynbasary Jeńis Elemesov sýbsıdııa shemalary arqyly 1,2 mlrd teńge jymqyrdy degen kúdikpen qamaýǵa alynǵan «Shańyraq» qoǵamdyq birlestiginiń basshysy Almasbek Sadyrbaıdyń isi nege arnaıy prokýrorlarǵa ótkenin túsindirdi.

Aıta ketý kerek, áýelde Almasbek Sadyrbaıdy Qarjylyq monıtorıng agenttiginiń Almaty oblysyndaǵy departamenti tutqyndaǵan bolatyn. 

— Bul isti qazir arnaıy prokýrorlar tergep jatyr eken. Oǵan ne sebep boldy, — dep surady jýrnalıst.

Agenttik ókili muny kúdiktiniń ústinen basqa da qylmystyq is qozǵalǵanymen túsindirdi.

— Negizi qaı isti qaı organ tergeıtini týraly sheshimdi prokýratýra quzyrly organ retinde qabyldaıdy. Olarda soǵan qatysty (Almasbek Sadyrbaıǵa — red.) basqa qylmystyq ister bolǵan. Sol sebepti bizdiń qylmystyq isti solarǵa qosty. Úkimettiń organdary bir adamnyń ústinen jeke-jeke qylmystyq isti tergemeıdi ǵoı. Sol sebepten olardyń bir organda bolsyn dep, bizdegi isti qysqartyp, ózderi tergep jatyr. Bizde bolǵan kezde Qylmystyq kodekstiń 189-bap bolatyn. Al prokýratýra tarapynan qandaı bap ekenin bilmeımin, — dedi Jeńis Elemesov.