Almasadam Sátqalıev jańartylatyn energııa salasynda 5 iri joba iske qosylatynyn aıtty
ASTANA. KAZINFORM – QR Energetıka mınıstri Almasadam Sátqalıev jańartylatyn energııa kózi (JEK) sektoryndaǵy aǵymdaǵy jaǵdaı jáne osy saladaǵy josparlar týraly baıandady.
«2023 jyldyń qorytyndysy boıynsha óńirlerdi turaqty elektr energııasymen qamtamasyz etý 100 paıyz boldy. Qazaqstanda 222 elektr stantsııasy elektr energııasyn óndirip jatyr. Onyń ishinde jalpy qýaty 2,8 GVt bolatyn 146 JEK nysany bar. 2023 jyly elektr energııasyn paıdalaný kórsetkishi 115 mlrd kVt/saǵ (2022 jyly 112,9 mlrd kVt/saǵ) deńgeıinde boldy, al elektr energııasyn óndirý 113 mlrd kVt/saǵ-ty (2022 jyly 112,8 mlrd. kVt/saǵ) qurady. 2024 jylǵa arnalǵan boljamdy generatsııa 115 mlrd kVt/saǵ deńgeıinde josparlanyp otyr», - dedi A.Sátqalıev Senatta «Ornyqty damý maqsattaryn iske asyrý sheńberinde Qazaqstanda balamaly energııa kózderi men jasyl tehnologııalaryn damytý» taqyrybyndaǵy mindetterdiń iske asyrylýyna monıtorıng júrgizý jónindegi parlamenttik komıssııa otyrysynda.
Onyń aıtýynsha, jańartylatyn energııa salasynda turaqty ósim bar. 2014 jyldan bastap onyń belgilengen qýaty 16 eseden astam ósti, ıaǵnı 178 MVt-tan 2023 jyly 2868 MVt-qa deıin.
«2023 jyldyń qorytyndysy boıynsha jańartylatyn energetıka obektileri óndirgen elektr energııasynyń kólemi 6,675 mlrd kVt/saǵ-ty nemese elektr energııasyn óndirýdiń jalpy kóleminiń 5,92 paıyzyn qurady. Bul rette, iri gıdroelektrostantsııalardy qosa alǵanda osy kórsetkish 13,7 paıyzǵa jetedi», - dedi mınıstr.
2030 jylǵa qaraı jańartylatyn energııa kózderiniń 15 paıyzdyq úlesine jáne 2050 jylǵa qaraı 50%-dyq úlesine jetkizý maqsaty bekitilgen.
«Qazirgi kezde pysyqtaýdyń túrli satysynda aýqymdy jobalar bar. Jalpy qýaty 5 GVt bolatyn 5 iri JEK jobasyn paıdalanýǵa berý 2029-2030 jyldarǵa josparlanǵan», - dedi vedomstvo basshysy.
