Almasadam Sátqalıev: MAGATE Abaı oblysynda AES salý ıdeıasyn maquldady

ASTANA. KAZINFORM — Atom energııasy jónindegi agenttik tóraǵasy Almasadam Sátqalıev Halyqaralyq atom energııasy agenttigi (MAGATE) Abaı oblysynda AES salý ıdeıasyn maquldaǵanymen túpkilikti sheshim áli qabyldanbaǵanyn aıtty. 

— Ulttyq ıadrolyq ortalyq halyqaralyq sarapshylardy tarta otyryp, Kýrchatovta atom stantsııasyn salý múmkindikterine egjeı-tegjeıli baǵalaý júrgizdi. Ondaı nysan salý múmkindigi rastaldy. Eger qandaı da bir naqty josparlar týraly aıtatyn bolsaq, mundaı jospar úkimettiń josparlarynan, energetık balansynyń boljamynan, ulttyq elektr jelisin damytý qajettiliginen týyndaý kerek. Ázirge Kýrchatovta atom stantsııasyn salýdyń naqty jospary joq. Memleket basshysynyń ǵylym qalashyǵyn qurý týraly tapsyrmasy bar, — dedi Almasadam Sátqalıev Májilis otyrysynan keıin BAQ ókilderine.

Sondaı-aq, ol Kýrchatov kelesi AES orny bolyp tańdalǵan kúnniń ózinde halyq kókeıinde Semeı polıgonynan qalǵan úreı eskeriletinin málime etti.

— Biz Abaı oblysyndaǵy joba ázirlep jatsaq, sonshalyq qaýipti bolyp eseptelmeıtin, shaǵyn jáne orta modýldik reaktorlardyń tehnologııalaryn paıdalaný kerek dep esepteımiz. Bul jaǵynan ashyq, transparentti rásim bar. Qoǵamdyq tyńdaý ótkizý, TJM qorytyndysyn alý, basqa ýákiletti memlekettik organdardyń maquldaýynan ótý, AES túsetin oryndy zertteý, halyqaralyq sarapshylardyń qorytyndysyn alý mindeti bar. Aıtpaqshy, MAGATE osy oryn boıynsha maquldaýyn berdi. Qazaqstannyń eshbir óńirinde jergilikti halyqtyń pikirin eskerýinsiz atom elektr stantsııasynyń qurylysy bastalmaıdy, — dedi Sátqalıev.

Buǵan deıin Kýrchatov ekinshi AES salýǵa nesimen qolaıly ekenine sholý jasaǵan edik.