Almasadam Sátqalıev Bas prokýratýranyń aıyptaýyna jaýap berdi
ASTANA. KAZINFORM – Búgin Úkimet qabyrǵasynda Energetıka mınıstri Almasadam Sátqalıev atalǵan vedomstvo zań talaptaryn buza otyryp, ınvestıtsııalar týraly kelisim jobasynyń talaptaryn ýaqytyly oryndamady degen aıypqa qatysty pikir bildirdi. Áńgime Batys Qazaqstan oblysyndaǵy metanol óndirisi boıynsha gaz-hımııa keshenine qatysty.
«Biz qýaty 120 myń tonna metanol óndirý jobasy týraly aıtyp otyrmyz. Bul joba boıynsha operator «Jaıyq petrolıým» kompanııasy. Ony iske asyrý sheńberinde aǵymdyq rásimderdi sheshý talap etiledi. Birinshiden, bul jobany daıyndap, qarjylandyrýdy qamtamasyz etý úshin kepil bazasyn daıyndaý qajet. Qarjylandyrýdy uıymdastyrýdy ónerkásipti damytý qory jáne Qazaqstannyń Damý banki josparlap otyr, ol jerde de sheshilmegen suraqtar bar. Sol máselelerdiń biri – ónerkásiptik rejımderdi qoldaný úshin tıisti komıssııa qurý», - dedi Almasadam Sátqalıev BAQ ókilderiniń saýalyna jaýap bere otyryp.
Mınıstr atalǵan komıssııany qurýdyń keshikkenin moıyndap otyr.
«Degenmen komıssııany qurýdyń keshigýi jobany iske asyrý barysyna áser etken joq. Biz qyzmetkerlerdi júkteýge baılanysty kidiris faktisin rastaımyz, bul oryndaýshylyq tártipke baılanysty keıbir olqylyqtar bolýy múmkin. Biz bul jobany tolyǵymen qoldaımyz, iske asyrý merzimine joǵaryda atalǵan faktorlar áser etken joq jáne joba operatorymen tikeleı jumys isteımiz», - deıdi ol.
Aıta keteıik, keshe Bas prokýratýra Energetıka mınıstrliginiń jobany ınvestormen kelisýdi keshiktirgenin anyqtaǵan edi. https://t.me/GenPr/3526
Bas prokýratýra men «Kazakh Invest» UK» AQ (Task Force) birlesken jumysy sheńberinde Batys Qazaqstan oblysynda metanol óndirisi boıynsha gaz-hımııa keshenin salý jobasyn iske asyratyn otandyq ınvestordyń problemasy anyqtaldy. Atap aıtqanda, Energetıka mınıstrligi zań talaptaryn buza otyryp (15 jumys kúniniń ornyna) ınvestıtsııalar týraly kelisim jobasy boıynsha kelissózder júrgizý jónindegi komıssııany qurý merzimin 60 kúnge deıin sozǵan.
Prokýratýranyń qadaǵalaý aktisi boıynsha jol berilgen buzýshylyqtar úshin Energetıka mınıstrliginiń departament dırektory tártiptik jaýapkershilikke tartyldy.
