Almasadam Sátqalıev AES qurylysy qalaı júrip jatqanyn aıtty

ASTANA. KAZINFORM — Elimizdegi tuńǵysh atom elektr stansasynyń «birinshi betony» shamamen 2029 jyly quıylady. Bul týraly Atom energetıkasy jónindegi agenttik tóraǵasy Almasadam Sátqalıev aıtty.

— «Rosatom» jumysty óte sátti bastady. Jumys kestege sáıkes júrip jatyr. Shamamen 50 uńǵyma burǵylandy. Topyraq alynyp, saraptalyp jatyr. Shamamen 2 myń núkteden radıonýklıd anyqtaýǵa saraptama júrgizildi. Gıdrologııalyq, gıdrotehnıkalyq, ınjenerlik saraptama, jergilikti jerge topografııalyq saraptama júrgizdik. Eki gıdrobeket ornatyldy. Jalpy, jumys kestege saı júrgizilip jatyr. Buǵan deıin aıtqanymyzdaı, 18 aıdyń ishinde jobalaý-izdestirý jumysy aıaqtalyp, stansanyń túpkilikti pishindemesin alamyz, — dedi agenttik basshysy Aqordada BAQ ókilderiniń saýalyna oraı.

Sondaı-aq agenttik basshysy kadrlardy daıyndaý bastalyp ketkenin aıtty.

— Ózderińiz biletindeı, Qazaqstannyń 7 joǵary oqý orny mamandandyrylǵan bólimsheler ashty. Buǵan qosa, halyqaralyq uıymdarmen, onyń ishinde Majarstan, Frantsııa, Japonııa, Qytaı jáne Reseıdiń kadrlar daıyndaý ortalyqtarymen Qazaqstan mamandaryn daıyndaý týraly kelistik. Munan bólek, qazirdiń ózinde Qytaı shamamen 200 grant bóldi. Qazir atom energetıkasy stansasynda jumys isteý boıynsha beıindi mamandyq alýǵa nıetti jas mamandardan ótinim jınaımyz. Olar Frantsııa, Qytaı, Reseı, Majarstan elderiniń energetıkalyq nysandarynda tájirıbeden ótedi, — dedi Almasadam Sátqalıev.

Onyń atap ótýinshe, reseılik joba boıynsha stansanyń «birinshi betonyn» quıý shamamen 2029 jyly bastalady.

Buǵan deıin Qazaqstan azamattary birinshi AES-ke qandaı ataýlar usynǵanyn jazǵan edik.