Almas Jalı kıno ındýstrııany Astana Hub arqyly qoldaýdy usyndy

ASTANA. KAZINFORM – Prodıýser Almas Jalı kıno ındýstrııasynyń ókilderine Astana Hub ortalyǵyn qoldaý baǵdarlamasy arqyly jumys isteýge ruqsat berý kerek degen oı aıtty.

«Fılmniń kórsetilimin uıymdastyrýdyń shyǵyndary kóp. Onyń ishinde salyq pen dıstrıbıýtelik komıssııa alymdary da bar. Sonyń saldarynan bıznes tabysynyń 30-40 paıyzyn tólemderge jumsaıdy. Bul bizdiń damýymyzǵa kedergi. Kıno ındýstrııasyna 4-8 paıyz kóleminde ońaılatylǵan biryńǵaı salyq mólsherlemesi bolsa dep usynamyz. Bul salyq júktemesin jeńildetip qana qoımaı jınalatyn aqshanyń ashyqtyǵyna áser eter edi», - dedi prodıýser.

Sondaı-aq, ol jergilikti deńgeıdegi kıno ındýstrııasyn damytýǵa kóbirek kóńil bóliný kerek degen oı aıtty. 

«Astana Hub salyq jeńildikteri men qajetti ınfraqurylymy bar daıyn ekojúıe dep esepteımin. Mundaı modeldi kreatıvti salalarǵa, sonyń ishinde kıno túsirý isine qoldaný búkil salanyń damýyna serpin bere alady. Kıno ındýstrııany Astana Hub ekojúıesine qosý birneshe jyl ishinde operatorlar men rejısserlerdiń, sýretshiler men basqa da mamandardyń ortaq málimetter bazasyn qurýǵa múmkindik beredi», - dedi ol.