Almas Jaqsylyqov Temir aýdanynyń ákimi qyzmetine taǵaıyndaldy
AQTÓBE. KAZINFORM – Aqtóbe oblysy Temir aýdanynyń ákimi qyzmetine Almas Jaqsylyqov taǵaıyndaldy. Ol buǵan deıin Aqtóbe qalasy Astana aýdanynyń ákimi boldy.
Aqtóbe oblysy ákimi baspasóz qyzmetiniń habarlaýynsha, Temir aýdandyq máslıhatynyń kezekten tys jıyrma segizinshi sessııasy ótti. Sessııaǵa Aqtóbe oblysynyń ákimi Ashat Shaharov pen aýdandyq máslıhat tóraǵasy Bolat Shaımov qatysty. Sessııa barysynda oblys ákimi Temir aýdanynyń ákimi laýazymyna Almas Jaqsylyqovtyń kandıdatýrasyn usynyp, ony tanystyrdy. Aýdandyq máslıhat depýtattary oblys ákimi usynǵan kandıdatýrany qoldap, daýys berdi.
- Almas Jaqsylyqov 1999 jyly Qazaq memlekettik basqarý akademııasyn «Eńbek resýrstaryn basqarý», 2019 jyly Qaınar akademııasyn «Quqyqtaný» mamandyqtary boıynsha támamdaǵan. Eńbek jolyn 2000 jyly «Kómirbank» AAQ Almaty qalasyndaǵy fılıalynyń qaýipsizdik qyzmetiniń qyzmetkeri bolyp bastaǵan. 2004 – 2009 jyldary aralyǵynda Aqtóbe oblystyq kóliktik ınfraqurlymdy damytý basqarmasynyń, Temir aýdandyq qurylys bóliminiń jetekshi mamany boldy. Al 2009 – 2013 jyldary aralyǵynda «Tazalyq», «Shubar-qudyq», «Shubarqudyq-jylý» kommýnaldyq memlekettik mekemeleriniń jáne «Centrum Kazakhstan» JShS dırektory laýazymdarynda qyzmet etti. 2013 – 2018 jyldary Shubarqudyq aýyldyq okrýgi ákimi apparatynyń bas mamany, Temir aýdany «Jastarmen jumys boıynsha resýrstyq ortalyǵynyń basshysy, Temir aýdandyq turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bóliminiń basshysy boldy. 2018 – 2023 jyldary Hromtaý qalasynyń ákimi, Aqtóbe qalasynyń «Astana» aýdany ákiminiń orynbasary bolyp jumys istedi. 2023 jyldyń qazan aıynan bastap Aqtóbe qalasynyń «Astana» aýdanynyń ákimi qyzmetin atqaryp keldi,- dep habarlady Aqtóbe oblysy ákiminiń baspasóz qyzmeti.
Aıta keteıik, búginge deıin Temir aýdanynda ákim bolǵan Salamat Amanbaev 2021 jyly taǵaıyndalǵan edi. Onyń qandaı qyzmetke aýysqany belgisiz.