Almas Óteshov aýyr atletıkadan Qyzylorda oblysy quramasynyń tizginin ustady
QYZYLORDA. KAZINFORM – Almas Óteshov aýyr atletıkadan Qyzylorda oblysy eresekter quramasynyń aǵa jattyqtyrýshysy bolyp taǵaıyndaldy.
Bul jóninde oblystyq dene shynyqtyrý, sport jáne týrızm basqarmasynyń basshysy Baqtııar Artaevtyń buıryǵy shyqty.
Almas Dáýletıaruly Óteshov aýyr atletıkadan QR Eńbek sińirgen sport sheberi, eki dúrkin álem chempıonaty men Azııa oıyndarynyń kúmis júldegeri, Azııa chempıony boldy.
Qazirge deıin ol basqarmaǵa qarasty «Muz aıdyny» mekemesinde ádisker, «Olımpıadalyq rezerv daıarlaý ortalyǵy» KMM dırektorynyń orynbasary qyzmetin atqardy.
Tájirıbeli maman endi oblysta aýyr atletıka sport túrin damytýǵa kúsh salady. Sondaı-aq sportshylardyń turaqty túrde álemdik dodalarǵa qatysýyna, jalpy nátıjesine jaýapty bolady.
Eske salsaq, budan buryn Baqyt Sársekbaev Qazaqstan jastar quramasynyń tizginin ustady.