«Almas qylysh» tarıhı fılmin túsirýge 5 mln dollar jumsaldy

Bul týraly Almatyda fılmniń premeralyq kórsetiliminde belgili boldy, dep habarlaıdy «QazAqparat» HAA tilshisi.

Fılm rejısseri Rústem Ábdirashev kórkem fılm qalaı túsirilgenin  baıandap berdi. Onyń aıtýynsha, «Almas qylyshty» túsirýge eki jyl ýaqyt ketken. Fılmge 500 adam tartylǵan. Onyń 200-i túsirilim tobynyń músheleri. Naqty túsirý jumystary 30-ǵa jýyq nysanda bes aı boıy júrgen.

Fılm stsenarııin jazýshy Smaǵul Elýbaı Іlııas Esenberlınniń «Almas qylysh» romanynyń jelisi boıynsha daıyndaǵan. Túsirý jumystary Almaty qalasy jáne Almaty oblysy aýmaǵynda, jarty bóligi «Qazaqfılm» kınostýdııasynda jasalǵan dekoratsııada ótken. Onda sýretshiler Shaıbanshahtyń saraıyn jasaǵan.

Fılmniń negizgi túpnusqasy tolyǵymen qazaq tilinde, arasynda jońǵar tilinde jáne soltústik mońǵol dıalektisi boıynsha sózder engen. 2017 jyldyń 4 qańtarynda kartınanyń orys tilindegi nusqasy jaryqqa shyǵady.

Rejısserdiń aıtýynsha, qazir dýblıaj jumystary júrgizilip jatyr. Onda sýbtıtr eýropalyq kórermen úshin aǵylshyn tilinde beriledi.

«Bul alǵashqy qarlyǵashy. Eger kórermen kóńilinen shyǵyp jatsa, ekinshi maýsymy bolady. Bizdiń tarıhymyz baı. Biz ata-babalarymyz aldynda qaryzdarmyz. Tarıhymyzdyń aqtańdaq betterin kórsetýge jol ashqan Táýelsizdikke myń alǵys», - dedi Rústem Ábdirashev.

Rejısser óz sózinde fılmge jumsalǵan qarajatty da aıtyp ótti. Onyń aıtýynsha, fılm bıýdjeti 2 mlrd teńgege jetken. Salyqtarymen eseptegende 5 mln dollar jumsalǵan. 

«Alda kelesi maýsymdar tartymdy, qundy bolady dep úmittenemin. Jańa maýsymǵa Jańa jyl merekesinen keıin kirisýimiz múmkin. Túsirilgen materıaldardan 2-3 serıaǵa qor bar. Kelesi jyl sońynda taǵy bir maýsym bolady», - dedi rejısser. 

Eske salaıyq, buǵan deıin Rústem Ábdirashev "Almas qylysh" fılmine birde-bir Ulttyq kompanııa kómektespedi, eshbir telearna usynys jasaǵan joq" dep kaz/article/2954280">ýáj aıtqan bolatyn.