Almas Arzyqulov: Májilis endi burynǵy formatta jumys istemeıdi
Májilistiń iriktelgen jańa depýtattary jaıly Qazaqstan strategııalyq zertteýler ınstıtýty Aqparattyq-taldaý jumysy bólimi basshysynyń orynbasary Almas Arzyqulov osyndaı pikir bildirdi, dep habarlaıdy QazAqparat tilshisi.
«Búgin partııalar jeńip alǵan oryndaryna qaraı kimder depýtat bolatynyn jarııa etti. Úsh partııanyń qaı-qaısysyn alsaq ta, quramy 70 paıyzǵa jańarǵanyn kórip otyrmyz. Qazaqstan halyq partııasy bolsyn, Aq jol nemese Nur Otan bolsyn quramy birshama ózgergen, Prezıdent tapsyrǵan kvota deńgeıi saqtalǵan», - dedi Almas Arzyqulov QazAqparat tilshisine telefon arqyly bildirgen pikirinde.
Onyń aıtýynsha, Nur Otan partııasynan usynylǵan depýtattardyń ishinde barlyq salanyń ókilderi bar.
«Olardyń ishinde memlekettik qyzmette jumys istegen azamattar, bilim men densaýlyq saqtaý, ónerkásip salasynan da, úkimettik emes uıymdardan da shyqqan adamdar barshylyq. Bul jerdegi basa nazar aýdaratyny – Nur Otan partııasy jastar men áıelderdiń 30 paıyzdyq kvota boıynsha tapsyrmasyn oryndap otyr. Odan bólek jańa kózqarastaǵy azamattardyń kelgenin aıtýǵa bolady. Meniń oıymsha, Májilis endi burynǵy formatta jumys istemeıdi. Jańa adamdar jańa kózqaraspen, jańa ıdeıamen, jańa jobalarymen keledi. Olar saıasatty burynǵydan qaraǵanda basqasha júrgizedi degen oıdamyn», - deıdi sarapshy.
Ol Ulttyq keńes músheleri qatarynan kelgen azamattardyń Májilistegi jumys anyq baıqalar dep úmit bildirdi.
«Ulttyq keńes músheleri qoǵamnyń ózekti máseleleriniń sheshimin endi depýtat retinde tabýǵa talpynary anyq. Jańa Parlamenttiń taǵy bir ereksheligi – jańadan kelgen tulǵalarmen qatar, búgin saıasatta júrgen, tisqaqqan saıasatkerlerdiń de qalýy. Túgelimen aýysyp ketse, keı jaǵdaıda jol silteıtin, túzetetin adamdar qalmas edi. Saıasatta júrgen biraz azamattar Májilis sapynda qaldy», - dedi ol.
Eske sala ketsek búgin «Nur Otan» partııasy Saıası keńesi Bıýrosynyń sheshimimen 76 kandıdattan turatyn tizim bekitilgen bolatyn. Depýtattyqqa kandıdattardyń 7-ýi ǵana burynǵy memlekettik qyzmetker, ıaǵnı Fraktsııa quramynda olardyń sany 10%-ten aspaıdy.
https://kaz.inform.kz/news/nur-otan-partiyasynan-mazhilis-deputattarynyn-tizimi-zhariyalandy_a3740254
