Belgili jyraý Almas Almatovtyń 70 jyldyǵyna arnalǵan kontsert ótti
ASTANA. KAZINFORM – QR Mádenıet jáne aqparat mınıstrliginiń qoldaýymen Roza Baǵlanova atyndaǵy «Qazaqkontsert» memlekettik akademııalyq kontserttik uıymynda belgili jyraý, folklor zertteýshisi, Qazaqstannyń eńbek sińirgen qaıratkeri Almas Almatovtyń 70 jyldyq mereıtoıyna arnalǵan «Bizdiń jármeńke – jyr-dastan» kontserti ótti.
Kesh barysynda QR Premer-Mınıstriniń orynbasary – Mádenıet jáne aqparat mınıstri Aıda Balaevanyń quttyqtaý haty oqyldy.
Quttyqtaýda Almas Almatovtyń ulttyq mádenıetti damytýǵa, qazaqtyń epıkalyq murasyn ǵylymı turǵyda zerdeleýge jáne jyraýlyq dástúrdi keıingi býynǵa jetkizýge qosqan úlesi atap ótildi.
– Sizdiń ulttyq ónerdi dáriptep, jyr-terme dástúrin jańǵyrtý jolyndaǵy eńbegińiz eleýli. Qazaq jyraýlyq dástúrin álemge tanytyp, ulttyq ónerimizdiń mádenı mura keńistiginde laıyqty oryn alýyna zor yqpal etip júrsiz, – delingen quttyqtaý hatta.
Almas Almatovtyń esimi dástúrli ónerdiń oryndaýshysy ári zertteýshisi retinde keńinen tanymal. Ol ár jyldary Frantsııa, Italııa, Shveıtsarııa, Reseı, Ózbekstan jáne Mońǵolııa sahnalarynda qazaqtyń rýhanı murasyn tanystyryp, halyqaralyq folklorlyq gastrolder men Azııa halyqtarynyń mýzykalyq sımpozıýmdaryna qatysqan.
Mınıstrlik málimetinshe, mereıtoılyq keshte jyr-dastandar men terme-tolǵaýlar oryndaldy. Kesh barysynda urpaqtar sabaqtastyǵyna aıryqsha mán berildi.
Almas Almatov sahnada «Jyr bastaý» shyǵarmasyn kórermenge tartý etse, jyrshynyń shákirtteri de óz ónerin ortaǵa salyp, jyraýlyq dástúrdi jalǵaı tústi.
Aıta keteıik, Astanada Almas Almatovtyń 60 jyldyq mereıtoıyna oraı «Uly Dala sazy» kontserti ótken.
