«Almanyń otany»: sheteldik tanymal blogerler Almaty týraly beınerolık túsirdi
ALMATY. QazAqparat – Arab-ızraıldik tanymal bloger Nýseır ıAsınniń komandasy Almatyǵa kelip, qalanyń sımvoly – alma týraly beınerolık túsirdi, dep habarlaıdy QazAqparat tilshisi.
Vıdeo túrli platformalarda, onyń ishinde YouTube, Instagram, Tik Tok jelilerinde jarııalandy. Jobanyń jalpy aýdıtorııasy 60 mıllıonnan astam paıdalanýshyny quraıdy.
Qazaqstannyń eń iri qalasy týraly beınerolık blogerdiń Instagram paraqshasynda qazirdiń ózinde 1 mln-nan astam qaralym jınady.«Siz álemdegi barlyq almanyń bir elden taralǵanyn bilesiz be? Siz ony eshqashan tappaısyz, sebebi, men almalar elindemin. Qazaqstanǵa qosh keldińiz! Bul Ortalyq Azııadaǵy el, bul jerde men qaıda qarasam da, barlyq jerde almany kóremin. Almanyń sýretteri, almanyń eskertkishteri, almanyń sýreti bar terezeler, alma desertteri, tipti almanyń atymen atalǵan qala bar. Bul Almaty qalasy, ol almanyń otany bolyp tabylady», - dedi komanda músheleriniń biri vıdeoda.
News Daily arnasy túrli elderdiń mádenı erekshelikterin jáne búkil álem boıynsha týrısterdiń bolýy tıis biregeı oryndardy kórsetetin beınerolıkterimen tanymal.
Almaty ákimdigi habarlaǵandaı, megapolıs týraly beınerolık qalanyń týrızm basqarmasy men Visit Almaty týrıstik aqparattyq ortalyǵynyń qoldaýymen túsirildi. Nas Daily komandasy jıyny bes beınerolık túsirdi, onyń tórti Almatyda, biri Astanada túsirildi. Olar jalpy Almaty men Qazaqstannyń mádenıeti, tarıhy jáne basqa da erekshelikterine arnalǵan
«Komanda músheleri Qazaqstanǵa kelgen saparlarynyń oń áserimen bólisti. Munda tátti taǵamdardyń kóptigin, ulttyq dástúrge baı ekenin, qonaqjaılylyǵy men tabıǵatynyń sulýlyǵyn atap ótti. Týrısterge Almatyǵa mindetti túrde kelýge keńes berdi», - dep habarlady Almaty ákimdiginiń baspasóz qyzmetinde.
