«Almaǵaıyp zamanda qazaq halqy óziniń muńynan aryla almaı turyp, basqa halyqtyń qaıǵysyna ortaqtasa aldy» - respýblıkalyq basylymdarǵa sholý
***
Keshe elordadaǵy Beıbitshilik jáne kelisim saraıynda Memleket basshysy, Qazaqstan halqy Assambleıasynyń Tóraǵasy Nursultan Nazarbaevtyń tóraǵalyq etýimen «Qazaqstandyq jol: turaqtylyq, birlik, jańǵyrtý» taqyrybynda Qazaqstan halqy Assambleıasynyń HІH sessııasy ótti. Osy jaıt arqaý bolǵan maqala «Egemen Qazaqstan» gazetiniń senbilik sanynda «Tuǵyrymyz - tynyshtyq, tiregimiz - turaqtylyq, tilegimiz - tatýlyq» degen taqyryppen berildi. Jıyn aldynda sóz sóılegen Elbasy: «Memlekettik tildi meńgerýge aldymen óz qandastarymyz mol úles qosýy kerek. Elimizdegi on mıllıonnan astam qazaq túgel ana tilinde sóılese, baılyqtyń úlkeni osy bolar edi. Bul til barshany biriktiretin, jastardy jaqyndastyratyn tatýlyq tiline aınalýǵa tıis! Men til týraly másele - saıasat máselesi emes ekenin talaı aıtqanmyn. Saıası sheshim baıaǵyda, Konstıtýtsııa men tıisti zańdar qabyldanýymen alynǵan bolatyn. Til týraly másele saıası saýdalaýdyń taqyryby bola almaıdy. Endi bul praktıkalyq másele», - deıdi.
«Egemen Qazaqstan» gazetiniń jazýynsha, keshe Astanadaǵy «RIXOS» qonaqúıinde Qazaqstan Prezıdentiniń kómekshisi - Qaýipsizdik keńesiniń hatshysy Marat Tájınniń tóraǵalyǵymen Ujymdyq qaýipsizdik týraly shart uıymynyń Qaýipsizdik keńesi hatshylary komıtetiniń otyrysy ótti. Jınalǵandar Ujymdyq qaýipsizdik sharty aımaǵyna kiretin elderdiń ózderiniń geografııalyq ornalasýy jaǵynan jáne UQShU aımaǵynyń úlken qurlyqtyń aýqymdy bóligin alyp jatýymen álem qaýipsizdigine osyǵan deıin áser etip kelgen jaǵdaılardan jáne jańadan týyndaıtyn yqtımal qaýip-qaterlerden tys qalmaıtynyna toqtaldy. Sonymen qatar Eýrazııa aımaǵy úshin qaýip oshaǵy bolyp otyrǵan Aýǵanstan jaıy da otyrysta jan-jaqty talqylandy. Maqala «UQShU: Mereıtoı aldyndaǵy kezdesý» degen taqyryppen berilgen.
***
«Almatyda Alataýdyń eteginde ótken jyly mamyrda bolǵan daýyl aldaǵy aıda qaıtalanýy múmkin. Bul pikirdi Qazaq ulttyq tehnıkalyq ýnıversıtetiniń dotsenti Mıhaıl Kazantsev bildirdi. Buǵan sebep bolǵan jaǵdaı, qala qurylysyn durys júrgizbeý kórinedi», - dep jazady «Aıqyn» gazeti búgingi sanyndaǵy «Daýyl qaıtalanýy múmkin be?» degen taqyryptaǵy maqalasynda. Sońǵy onjyldyqta retsiz salynǵan qurylysqa baılanysty aýanyń tabıǵı aınalymy buzyldy. Naqty aıtqanda, bıik ǵımarattardyń temir-beton qabyrǵalarymen kedergiler turǵyzylǵan. Aımaqtyń gazǵa toly aýasy óziniń tabıǵı qozǵalys arnalarymen kete almaıdy, ol jınalyp, burynǵydan da kúshti qyza bastady. Bul daýyl soǵýyna sebepshi boldy, - deıdi M.Kazantsev.
Halyqtyń qansha paıyzy ózin turǵyn úımen qamtamasyz ete alady? Qansha otbasy baspanaǵa muqtaj? Jurtshylyqtyń ortasha jalaqysy qansha? Al ortasha dárejedegi qarjymen halyqtyń bankten nesıe alýǵa kúsh-qýaty jete me? «Aıqyn» gazetiniń jazýynsha, bul saýaldarǵa jaýap «Nur Otan» HDP fraktsııasy janyndaǵy Óńirlik saıasat jáne máslıhattarmen jumys jasaý jónindegi keńestiń otyrysy barysynda málim boldy. Qazaqstanda úı alý kezeginde 150 myńǵa jýyq otbasy tursa, onyń 89 myńy - áleýmettik jaǵynan álsiz toptar, al 52 myńy - bıýdjet mekemelerinde qyzmet isteıtin dárigerler, muǵalimder, 5 myńnan astam otbasy apattyq úılerde turady. Munymen qosa, baspanasy joq jarty mıllıonnan astam jas otbasylar bar.
***
«Alash aınasy» gazetiniń turaqty «Dat!» aıdarynda QR Parlamenti Májilisiniń depýtaty, «Vaınah» sheshen-ıngýsh mádenı qaýymdastyǵynyń teń tóraǵasy Ahmet Mýradovpen aradaǵy suhbat «Almaǵaıyp zamanda qazaq halqy óziniń muńynan aryla almaı turyp, basqa halyqtyń qaıǵysyna ortaqtasa aldy» degen taqyryppen berilgen. Basylym tilshisiniń barlyq saýaldaryna egjeı-tegjeıli jaýap bergen halyq qalaýlysy: «Taǵy aıtarym, «bir Otanym anda, ekinshisi mynda» degen bolmaıdy. Otan - bireý ǵana. Al naǵyz azamat úshin Otanǵa degen sezimmen qatar, sol Otan aldyndaǵy jaýapkershiliktiń bolǵandy da mańyzdy. Sol úshin aıtar edim, anaǵa degen sezimin Otanyna da bildire alǵan jigit qana, óziniń uly boryshyn aqtaı alady»,- deıdi.
***
«Gollandtyq AD Sportwereld» jýrnaly álemniń eń úzdik konkı stadıondarynyń reıtıngin jasady. tizim basynda Astana qalasyndaǵy «Alaý» muz aıdyny tur», - dep jazady «Astana aqshamy» gazeti «Abyroıy asqan «Alaý» degen taqyryptaǵy aqparatynda. Nıderlandyq jýrnalıster jasaǵan bul reıtıngti ádil deýge bolady.
