Almaǵaıyp zamanda ımamdar tatýlyq pen tynyshtyq týraly jamaǵatqa kóbirek nasıhat aıtýy tıis - Bas múftı

ASTANA. QazAqparat - Qazaqstan musylmandary dinı basqarmasynyń tóraǵasy Erjan qajy Malǵajyuly Astana qalasynyń ımamdarymen kezdesip, Joldaý júktegen mindetter, dinı qyzmetkerlerdiń belsendi jumys isteýi, meshitke kelgen jamaǵatqa joǵary deńgeıde qyzmet kórsetý, t.b. máselelerdi talqylady, - dep habarlady QMDB Baspasóz qyzmeti.

«Bárimizge Otan - ortaq, jer - ortaq, taǵdyrymyz bir. Sondyqtan Elbasy Joldaýyna ún qatyp, úles qosý - dindarlardyń da abyroıly mindeti. Ult kóshbasshysy Qazaqstan halqyna birlik, yntymaq aýadaı qajet ekenin aıtty. Osynaý almaǵaıyp zamanda ımamdar da tatýlyq pen tynyshtyq týraly jamaǵatqa kóbirek nasıhat aıtýy tıis. Biz alǵa qoıǵan maqsatymyzǵa jetetinimizge senýimiz kerek. Aǵym degen aǵyp óte shyǵatyn dúnıe. Kezinde qanshama aǵymdar tarıh betinen óship ketti. Eń bastysy bir-birlerińizben tatý, baýyrmal bolyńyzdar», - dedi Bas múftı Erjan qajy Malǵajyuly ımamdarmen kezdesýde.

QMDB Tóraǵasy memlekettik mańyzy bar Astana men Almaty qalalarynyń dindarlaryna eki ese jumys isteý qajettigin aıtyp, dinı qyzmette belsendilik tanytýǵa shaqyrdy.