Almaǵambet kólinen 507 keli óli balyq jınaldy
«Bıyl Jaıyq ózenine sý kelip, deńgeıi kóterilip jatyr. Máselen, 24 sáýirde ózen saǵalaryna sý shyǵa bastady. Al, 26 sáýirde Atyraý qalasynyń mańyndaǵy Bezymıannyı kólinde balyqtyń qyrylý deregi anyqtaldy. Osyǵan baılanysty jergilikti ákimdikten arnaıy komıssııa qurylyp, tekserý júrgizildi. Komıssııa quramyna jergilikti atqarýshy organnyń ókilderi, Jaıyq-Kaspıı oblysaralyq basseındik balyq sharýashylyǵy ınspektsııasynyń mamandary endi. Atalǵan sý aıdynynan 65 keli óli balyq jınaldy. Balyqtyń qyrylý deregi Mahambet aýdanyndaǵy Almaǵambet kólinde de tirkeldi. Bul kólden 507 keli óli balyq jınalyp alyndy», - dedi Aıan Bahııanov.
Onyń aıtýynsha, Inder aýdanynda Jaıyq ózenine taıaý ornalasqan 22 kól bar. Onyń tórteýine sý kelgen. Al, Mahambet aýdanyndaǵy 18 kóldiń altaýynda sý paıda boldy.
«Balyqtyń qyrylýynyń basty sebebi - Jaıyq ózeniniń saǵasyna shyǵyp, sý aıdynyna qaıta orala almaýynan bolyp otyr. Óıtkeni, saǵalarǵa sý tez kelgen. Balyqtar sýmen birge shyqqan. Sý keri qaıtqanda, ottegi de azaıǵan. Bul balyqtyń qyrylýyna sebep bolǵan», - dedi Aıan Bahııanov.
Oblystyq balyq sharýashylyǵy basqarmasynyń basshysy Artýr Sádibekulynyń aıtýynsha, Mahambet aýdanyndaǵy Almaǵambet kólinde 10 jyldan beri sý bolmaǵan.
«Bul kólde jyńǵyldyń ósýine sebep boldy. Bıyl kólge sý keldi. Kólge sýmen birge kelgen balyq jyńǵyldyń arasynda qalyp qoıǵan», - dedi Artýr Sádibekuly.
Qazir Almaǵambet kólinde balyqtardy qutqarý jumysy jalǵasyp jatyr. Oǵan Jaıyq-Kaspıı oblysaralyq basseındik balyq sharýashylyǵy ınspektsııasynan 40 ınspektor, Alǵa aýyldyq okrýginen 8 adam tartylǵan.
Eske sala ketelik, budan buryn Atyraý qalasynyń mańynda balyqtyń qyrylý sebebi aıtylyp, keıin Almaǵambet kólinde balyqtyń neden qyrylǵany belgili bolǵanyn habarlaǵan edik.
