«Alma-TV»-ǵa óńirlerde ártúrli baǵa qoldanǵany úshin aıyppul salyndy
ALMATY. QazAqparat - «Alma-TV» JShS-nen QR «Básekelestik týraly» zańyn buzǵany úshin memleket paıdasyna 213,3 mln. teńge óndirip alyndy. Bul týraly Almaty qalasy prokýratýrasynyń baspasóz qyzmetinen habarlady.
«Almaty q. prokýratýrasy G. A. Shın. esimdi azamattyń aryzyn tekserý nátıjesi boıynsha, Almaty qalasy boıynsha monopolııaǵa qarsy ınspektsııasyna QR Ákimshilik quqyqbuzýshylyq Kodeksiniń 147-babynyń 3 tarmaǵyna sáıkes, «Alma-TV» JShS-in ákimshilik jaýapkershilikke tartý arqyly, zańdylyqtyń buzylýyn joıý týraly usynys engizdi.
Bul zańdy tulǵa, óziniń telekommýnıkatsııa salasynda basymdy jaǵdaıǵa ıe ekendigin paıdalana otyryp, elimizdiń jekelegen aımaqtarynda QR «Básekelestik týraly» zańyn buzyp, kabeldik teledıdar tutynýshylary úshin ár túrli baǵalar qoldanyp kelgen» - delingen prokýratýranyń habarlamasynda.
Monopolııaǵa qarsy ınspektsııa óz kezeginde, Almaly aýdandyq prokýratýrasynyń usynysyn qarap tekserý nátıjesi boıynsha, prokýrordyń «Alma-TV» JShS-ǵa qatysty talabyn oryndaı otyryp, 2014 jyldyń 29 qyrkúıeginde QR Ákimshilik quqyqbuzýshylyq Kodeksiniń 147-babynyń 3 tarmaǵyna sáıkes, ákimshilik quqyqbuzýshylyq týraly hattama toltyryp, Almaty qalasynyń mamandandyrylǵan aýdanaralyq ákimshilik sotyna tıisti materıaldar jiberedi.
Alaıda, «Alma-TV» JShS-niń ákimshilik quqyqty buzǵandyǵy týraly derekter jetkilikti bola tura, Almaty qalasynyń mamandandyrylǵan aýdanaralyq ákimshilik soty 2014 jyldyń 31 qazanynda ákimshilik quqyqbuzýshylyq nyshanynyń joqtyǵy sebebinen ákimshilik quqyqbuzýshylyq isi boıynsha óndiristiń toqtatylatyndyǵy týraly tıisti qaýly shyǵarady.
Keıin, Almaly aýdanynyń prokýratýrasy sottyń bul qaýlysymen kelispeı, óz ustanymyn dáıekti túrde qorǵaı otyryp, Almaty qalasynyń qalalyq sotyna zańsyz qaýlynyń kúshin joıǵyzyp, atalmysh kompanııany ákimshilik jaýapkershilikke tartý týraly jańa qaýlynyń qabyldanýy kerektigi týraly apellıatsııalyq shaǵym túsirdi.
«2014 jyldyń 11 jeltoqsanynda Almaty qalalyq sotynyń alqasy prokýrordyń apellıatsııalyq shaǵymyn tolyǵymen qanaǵattandyrdy. Quqyq buzýshy «Alma-TV» JShS 129 300 000 teńge kóleminde aıyppul tóleý túrinde ákimshilik jaýapkershilikke tartyldy. Bul soma, zańsyz monopolıstik áreketti júzege asyrýdyń arqasynda alynǵan tabystyń 10 paıyzyn quraıtyndyǵyn aıta ketken jón. Sonymen qatar, atalmysh kompanııadan 84 mln. teńge kóleminde monopolııalyq tabys tárkilenedi», - delingen prokýratýra habarlamasynda.
Osylaısha, Almaly aýdany prokýratýrasynyń tabandylyq tanytýynyń arqasynda, quqyq buzýshy «Alma-TV» JShS naryqtaǵy óziniń basymdy jaǵdaıyn asyra paıdalanǵany úshin (buǵan QR «Básekelestik týraly» zańymen tyıym salynǵan) jaýapkershilikke tartyldy jáne odan 213,3 mln. teńge memleket paıdasyna óndirip alyndy.
