Alma-Arasan taý shatqalyna barý aqyly boldy ma – «QazAvtoJol» túsinik berdi

ALMATY. QazAqparat – Almatylyqtar «QazAvtoJol» ulttyq kompanııasy Alma-Arasan taý shatqalyna baratyn joldy jaýyp tastaǵanyn, alaıda, onda taksılerdiń júrip jatqanyn aıtyp shaǵymdandy, dep habarlaıdy QazAqparat tilshisi.

«Bul Alma-Arasanda bolyp jatqan jaǵdaı. «QazAvtoJol» qyzmetkerleri «ary qaraı jol nashar» dep bógetten ary qaraı jibermeı jatyr. Alaıda, taksıler júrip jatyr ǵoı, osylaısha aıtqan nashar joldary jaqsy jolǵa aınalyp jatyr. Úlken Almaty kóline qyzmettik kólikpen 30 myń teńgege jetýge bolady. Bul halyq úshin ádiletti is dep oılamaımyn», - dep jazyldy jelidegi vıdeodaǵy jazbada.

«QazAvtoJol» ulttyq kompanııasy Almaty qalalyq polıtsııa departamentiniń №775 nusqamasy boıynsha «Almaty-Kosmostantsııa» jolynyń 15-34 shaqyrymy ýchaskesinde avtokólikterdiń qozǵalysy shektelgenin habarlady.
«Avtokólikterdiń qozǵalysyn shekteý - tereń shuqyrlar túrindegi aqaýlar men júris bóliginiń (taýly jer) tarylýyna baılanysty engizildi. Polıtsııanyń nusqamasyna sáıkes, joǵaryda atalǵan ýchaskege Ulttyq park, jol organdary qyzmeti, shekara zastavasy,»Kosmostantsııa«ǵylymı bazasy, meteorologııalyq jáne gıdrologııalyq bazalar men Almaty qalasy týrızm basqarmasynan bólek basqa avtokólikterge ótýge tyıym salynady», - delingen «QazAvtoJol»habarlamasynda.
Degenmen jaıaý týrsıter men velosıpedshiler úshin eshqandaı shekteý joq. Sondaı-aq qyzmettik kólikterdiń adamdardy aqyly túrde aparatyny týraly aqparat shyndyqqa janaspaıdy.
«Jol qyzmetteri atalǵan ýchaskeni kútip ustaýmen aınalysyp júr. Arnaıy tehnıkanyń kómegimen taý jynystarynyń qulaýy, tastardyń qulaýy, qar kóshkini men basqa da jaǵdaılardyń saldaryn joıýmen aınalysyp jatyr. Ulttyq kompanııa atalǵan ýchaskede patrýldeýdi kúsheıtý jáne arnaıy reıd uıymdastyrýǵa járdemdesý úshin qalalyq polıtsııa departamentine júginýge nıetti», -dep habarlady «QazAvtoJol» UK» aktsıonerlik qoǵamy.