Alma-Arasan shatqalynyń baqylaý beketine «Sergek» kameralary qoıylady
ALMATY. QazAqparat - Almaty mańyndaǵy Alma-Arasan shatqalyna kirý tólemderin avtomattandyrý boıynsha pılottyq joba iske qosylady, dep habarlaıdy QazAqparat tilshisi.
«Qazir bizde tólemder qolma-qol júrgizilip otyr. Osy oraıda oryn alyp jatqan keıbir keleńsizdikterdi túbegeıli joıǵymyz keledi. Sol sebepti biz Almaty qalasynyń ákimdigimen, sonymen qatar «Ońaı» jáne «Sergek» kompanııalarymen birlese otyryp baqylaý pýnktterinde tólem júıelerin avtomattandyrý boıynsha jumys isteýdemiz. Onyń ishine Alma-Arasan shatqalynda ornalasqan baqylaý beketi de kiredi», - dedi Іle-Alataý ulttyq parkiniń ókili Tilek Ádiljanov.
Onyń aıtýynsha, baqylaý beketi kameralarmen, týrnıkettermen jáne ózine-ózi qyzmet kórsetý termınaldarymen jabdyqtalady. Endigi ýaqytta kelýshiler tabıǵı qoryqtyń aýmaǵyna kirý úshin ózderi tólem jasaı alady.
«Bul pılottyq joba. Jalpy alǵanda Qazaqstan boıynsha mundaı júıe ázirge joq. Eger joba ózin aqtaıtyn bolsa, ózge de ulttyq parkterde bul júıe qoldanysqa enetin bolady. Jobany kóktemge taman iske qosý josparlanýda", - dep atap ótti Tilek Ádiljanov.
Endi ulttyq parkke kirý tártibi basqasha bolmaq. Avtokólikpen kelgen týrıster kólikterinen túsip tólem jasaıdy. Basylyp shyqqan shtrıh-kodty engizedi. Sodan keıin ǵana shlagbaým avtomatty túrde ashylady. Qazir tólem jasaýdyń eki nusqasy qarastyrylyp jatyr: qorǵalǵan aýmaqqa kirgen boıda jáne shyqqan kezde tólem jasaý. Ulttyq parkke kirý aqysyn "Ońaı" kartochkasymen, saıt nemese bank kartochkalary arqyly tóleýge bolady. Aıta keteıik, qazirgi tańda Іle-Alataý ulttyq parkiniń Alma-Arasan shatqalyna kirý úshin bir adam 450 teńge tóleýi tıis.
