Alma-Arasan shatqalyna kirý aqyly bolady
ALMATY. QazAqparat - 1 mamyrdan bastap Іle Alataýy memlekettik ulttyq tabıǵı saıabaǵynda avtobýs jolaýshylarynan Alma- Arasan shatqalyna kirý úshin aqy alynatyn bolady.
Bul týraly «QazAqparat» HAA tilshisi Ulttyq saıabaqtyń ekologııalyq aǵartý jáne týrızm bólimine silteme jasap habarlady.
Ulttyq parkta málim etilgendeı, aqy №28 avtobýsy arqyly ekobeketti tegin ótetin demalýshylardan alynady. Endi avtobýs jolaýshylary mashınamen nemese jaıaý kelgen qonaqtarmen teń dárejede 426,9 teńge tóleıtin bolady.
«Bul soma eki bólikten turady - 226 teńge (0,1 AEK) erekshe qorǵaýǵa alynǵan tabıǵı aýmaqty paıdalanǵany úshin (QR «Salyq jáne bıýdjetke tólenetin basqa da mindetti tólemder týraly» kodeksiniń 508-511-baptary) tólense, 200 teńge - Ulttyq parktyń qyzmeti úshin alynady. Onyń ishine týrıstik trop, tamashalaý alańdary, qoqys tazalaý, ájethana jáne t.b. (QR AShM Orman sharýashylyǵy jáne janýarlar álemi komıtetiniń №328 buıryǵy). Qarjy tólengennen keıin fıskaldy chek beriledi», - dep habarlady Ulttyq parkte.
Bul somany tolyq tóleýden saıabaqtyń aýmaǵynda saıajaılary bar nemese sonda turatyn jeke tulǵalar bosatylǵan.
«Ulttyq parkte birneshe sanattaǵy azamattarǵa jeńildikter qarastyrylǵan. Stýdentterge (stýdenttik bıleti boıynsha) 25%, zeınetkerler (zeınetkerlik kýáligi boıynsha) úshin 50 % jeńildik bar. Mektep oqýshylary men múgedekter tek kirgeni úshin - 226.9 teńge tóleıdi», - dep habarlady Ulttyq parkte.
