AllurAuto avtomobıl kompanııasy QR halyq ártisi R. Rymbaevaǵa jol talǵamaıtyn SsangYong Actyon temir tulparyn syıǵa tartty

ALMATY. 27 jeltoqsan. QazAqparat /Ádilet Musahaev/ - Búgin Almatydaǵy AllurAuto avtomobıl kompanııasynyń bas keńsesinde Qazaqstannyń halyq ártisi Roza Rymbaevaǵa SsangYong Actyon (Sang Iong) avtokóligin saltanatty túrde tabystaý rásimi ótti.

Jaqynda R.Rymbaeva elimizdiń ındýstrııalyq-ınnovatsııalyq damý baǵdarlamasyn qoldaý maqsatynda Qostanaı qalasyndaǵy avtokólik qurastyrýmen aınalysatyn «AgroMashHoldıng Qazaqstan» AQ-nyń zaýyttarynda bolyp, sondaǵy jumysshylarǵa arnap shaǵyn kontsert ótkizgen bolatyn.

«Men 3 kúnniń ishinde elimizdiń 10 zaýytynda bolyp, ondaǵy istelip jatqan jumys barysymen tanysyp, múmkindik bolǵan jerde jumysshylarǵa arnap án de saldym. Buryn elimiz munaı, bıdaı jáne taǵy basqa shıkizattardy eksporttaıdy dep oılaýshy edim. Alaıda memleketimizdegi zaýyttarǵa sapar jasaý barysynda bizdiń de ónerkásipter kórshi eldermen básekelese alatyn sapaly taýarlar shyǵaratynyna kózim jetti. Bizde ónerkásipter men mekemeler jaqsy damyp keledi, sondyqtan qazaqstandyqtarǵa ekonomıkamyz áli de qaryshtaı túsedi dep senimdi túrde aıta alam», -deıdi R.Rymbaeva.

AllurAuto avtomobıl kompanııasynyń Bas dırektory Andreı Lavrentev Roza Qýanyshqyzyna avtokólikti úlken maqtanyshpen tabys etetindigin aıtady. «R. Qýanyshqyzynyń sahnada júrgenine bıyl 35 jyl tolady, sondyqtan bizdiń mekemelerdi aralaǵan ánshilerdiń arasynan osy kisini avtokólikke laıyq dep tańdadyq», -dep atap ótti óz sózinde A. Lavrentev.

Atalǵan kompanııa Ońtústik koreılik SsangYong Motors Corporation mekemesiniń kólikterin 2010 jyldyń tamyzynan bastap quraýda. AllurAuto mekemesi qazirgi tańda SsangYong-Rexton, Kyron, Actyon, Actyon Sports syndy avtokóliktiń tórt markasyn óndirýde. Kompanııa basshylary keleshekte ónimderin syrtqy naryqqa shyǵarýǵa nıetti ekendikterin bildirdi.