Alleıaǵa aınalǵan jol: Almatyda Pýshkın kóshesi qalaı túrlenip jatyr
ALMATY. KAZINFORM – Almatyda Pýshkın kóshesiniń bir bóliginde jaıaý júrginshiler alleıasy salynyp jatyr.
Qala ákimdigi tanystyrǵan jobaǵa sáıkes, Pýshkın kóshesi Raıymbek batyr dańǵylynan Gogol kóshesine deıin jańǵyrtylady.
Alaıda kósheniń alleıaǵa aınalatyn bóligi — tek Raıymbek batyr dańǵylynan Maqataev kóshesine deıingi aralyqtaǵy shyǵys jaǵy. Batys bóliginde kólik qozǵalysy saqtalady.
Qurylys jumystaryna baılanysty 2025 jyldyń 31 shildesinen bastap kósheniń osy bóliginde kólik qozǵalysy ýaqytsha toqtatyldy.
Almaty ákimdigi aýmaqty jańǵyrtý jumystary aıaqtalǵannan keıin bul bólik jaıaý júrginshilerge arnalǵan alleıaǵa aınalyp, kólik qozǵalysy úshin birjola jabylatynyn málimdedi.
Jobanyń qazir qaı satyda ekenin anyqtaý úshin Kazinform agenttigi Almaty qalasynyń qoǵamdyq keńistikterdi damytý basqarmasyna júgindi.
Vedomstvo málimetinshe, búgingi tańda joba boıynsha jumystardyń jalpy kóleminiń 70%-y oryndalǵan.
Jobany iske asyrýǵa 2,7 mlrd teńge bólingen. Merdiger uıym — «Construction Group Samruk» JShS.
— Qoldanystaǵy qurylys normalaryna sáıkes, qurylys-montajdaý jumystarynyń aıaqtalý merzimi — 2026 jylǵy sáýir aıynyń sońy. Alaıda qala ákimi bergen tapsyrmaǵa boıynsha nysandy 2025 jyldyń sońyna deıin paıdalanýǵa berý josparlanyp otyr, — dep habarlady basqarmadan.
Qazir kóshede 20 myń sharshy metr tas tóseý jumystary aıaqtalyp keledi. Aldaǵy ýaqytta munda 272 syrtqy jaryqtandyrý baǵanyn ornatý jáne qosý josparlanyp otyr.
Odan bólek kógaldandyrý jumystary aıasynda 277 aǵash pen 27 000 túrli buta otyrǵyzylady, shamamen 300-ge jýyq shaǵyn sáýlet nysandaryn ornatylady.
— Pýshkın kóshesiniń Raıymbek batyr dańǵylynan Maqataev kóshesine deıingi bóliginiń shyǵys jaǵynda jaıaý júrginshiler aımaǵyn qurý kózdelgen. Bul rette aýmaq ishinara ǵana jabylǵan, al negizgi bóligi jaıaý júrginshiler men avtokólikter úshin ashyq, — dep túsindirdi basqarmadan.
Sonymen qatar vedomstvo osy jobadan bólek qalanyń basqa kóshelerinde avtokólik jolyn qoǵamdyq keńistikke aınaldyrý boıynsha jumys júrgizilmegenin málimdedi.
Eske salaıyq, buǵan deıin jańǵyrtý jumystary aıasynda Esentaı ózeni jaǵalaýynda jańadan quıylǵan betonnyń nelikten qaıta buzylǵanyn jazǵanbyz.
