Allergııanyń týý sebepteri
ASTANA. QazAqparat - Allergııa - aǵzanyń ımmýndyq júıesi belgili bir zattarǵa keri áser berýi. Bul termın men anyqtama allergııany sıpattaýǵa azdyq etedi. Basynan ótkergender bul jaǵdaıdy aýyzeki tilde «kózim jasaýraıdy», «teri qyshıdy», «usaq jaralar shyǵyp ketedi», «murnymnan sý toqtamaıdy», «bet-aýzym qyshıdy» dep sıpattaıdy. Bul týraly massaget.kz jazady.
Mine, dalada kók shyǵyp, kóshe boılarynyń tazalanatyn ýaqyty jetti. Mundaı ýaqytta allergııanyń aldyn alý qajet. Ol úshin neni bilý kerek?
Allergııanyń sebebi
Eger sizdiń allergııańyz kóktemniń ortasynan kúz ortasyna deıin jalǵassa, onda siz pollıgoz allergııasyna shaldyqqansyz. Pollıgoz allergııasy - ósimdiktiń tozańynan paıda bolatyn allergııanyń bir túri.
Aǵashtyń, taldyń, shóptiń tozańy murynǵa túsedi, ımmýndyq júıe ony bógde zat retinde qabyldaıdy. Sonyń áseri vırýsqa ne bakterııaǵa tán, al aǵza bóten zatty shyǵarýdyń jolyn izdeıdi. Qanda gıstamın atty bıologııalyq belsendi zat paıda bolady, odan jótel, túshkirý, tumaý paıda bolady, kózden jas ta aǵady.
Negizi allergııa aýrý dep eseptelmeıdi, bul - bógde zatqa jaýap beretin aǵzanyń erekshe kúıi.
Aǵzanyń mundaı jeke reaktsııasyn adam boıynan alyp tastaý múmkin be? Joq, osyǵan kelgende medıtsına qaýqarsyz. Biraq, belgili bir ýaqytqa deıin emdeýge jáne onyń aldyn alýǵa bolady.
Allergııasy bar adamnyń janynda júrip, «allergııa juqtyryp alam» dep oılamasańyz da bolady. Al allergııasy bar adam ózge allergenderge beıim bolady.
Allergııany qozdyratyn zattar:
- qorshaǵan orta lastyǵy;
- kúızelis;
- álsiz ımmýnıtet;
- temeki;
- antıbıotık;
- durys tamaqtanbaý;
Jyl mezgilderinde ózińizdi baqylap, aǵzańyzǵa ne jaǵyp, ne jaqpaıtynyn bilýińizge bolady. Negizinen allergııa kóktem mezgilinde aǵash tozańdarynan, jazda shópterden, kúzde aramshópterden órshıdi.
Álemde júzden astam allergııa tozańdary kezdesedi, sol úshin dárigerge kórinip, sol júzdiń ishinde qaısysy sizdiń mazańyzdy alyp júrgenin bilýińiz kerek. Onyń aldyn alyp, emdik sharalaryn jasaǵan abzal. Emdik sharasyn endigi jazbamyzdan oqı alasyzdar.
