Allergııalyq rınıt neden paıda bolady, onymen qalaı kúresý kerek
ASTANA. KAZINFORM — Rınıttiń eń kóp taralǵan «arandatýshylary»: ósimdik tozańy, úı shańy, janýarlardyń júni, zeń men sańyraýqulaqtar, parfıýmerııa, turmystyq hımııa.
Allergııalyq rınıt — bul allergııadan týyndaǵan muryn shyryshty qabyǵynyń ınfektsııalyq emes qabynýy. Immýndyq júıe tozańmen, úı shańymen, janýardyń shashymen belsendi kúrese bastaıdy, nátıjesinde isiný, murynnan sý aǵý, túshkirý jáne qyshý paıda bolady. Qarapaıym tilmen aıtqanda bul murynda «ómir súretin» allergııa.
Rınıttiń eń kóp taralǵan «arandatýshylary»: ósimdik tozańy, úı shańy, janýarlardyń júni, zeń men sańyraýqulaqtar, parfıýmerııa, turmystyq hımııa. Tuqym qýalaýshylyq ta úlken ról atqarady.
— Eger murynnan sý aǵa berse, biraq temperatýra bolmasa, tamaq aýyrmaı, jaǵdaıy qalypty bolsa — bul allergııa bolýy múmkin. Sýyq tıgen kezde siz az túshkiresiz. Eger muryn, kóz, tipti qulaq qyshysa, bul allergııanyń ádettegi belgisi. Eger kóktem saıyn nemese kúzde murynnan sý aǵa bastalsa, bul allergııa. Sýyq tıgende ádette 5-7 kúnde ketedi, allergııa birneshe aıǵa sozylýy múmkin, — deıdi Kardıologııa jáne ishki aýrýlar ǴZI Respýblıkalyq allergologııa ortalyǵynyń basshysy, allergolog-ımmýnolog dáriger Araı Batyrbaeva.
Emdelmegen allergııalyq rınıt sozylmaly sınýsıtke ákelýi múmkin, uıqynyń buzylýy jáne sharshaý, kontsentratsııa men ómir sapasynyń tómendeýi, bronh demikpesi paıda bolady. Bul ásirese balalar úshin qaýipti: nashar uıqy, túnde tynys alý problemalary, ashýlanshaqtyq, mekteptegi úlgerimniń tómendeýi.
Ne nársege allergııańyz bar ekenin qalaı túsinýge bolady?
Birinshi qadam — allergolog nemese otorınolarıngologqa barý kerek. Ári qaraı dáriger arnaıy IgE antıdenelerine teri synamalary men qan taldaýyn taǵaıyndaı alady.
Odan birjola qutylýǵa bolady ma?
Iá, baqylaýda ustaýǵa bolady, al keıbir jaǵdaılarda allergenge sezimtaldyqty nólge deıin tómendetýge bolady:
— Múmkindiginshe allergenderden aýlaq bolyńyz,
— Tozań maýsymy kezinde terezelerdi jabyq ustańyz,
— Kirdi balkonǵa emes, úıde jaıyńyz,
— Aýa tazartqyshtar men shańsorǵyshtardy qoldanyńyz,
— Eger janýarlarǵa reaktsııa bolsa, olarmen baılanysty shekteńiz,
— Aptasyna keminde 2 ret úıdi tazalap turyńyz.
Jańa býyn antıgıstamınderi qyshýdy, murynnan sý aǵýyn, túshkirýdi jeńildetedi, murynǵa steroıdty spreıler isiný men qabynýdy jeńildetedi, tamyrdy taryltatyn tamshylardy tek 3-5 kún qoldanýǵa bolady, áıtpese táýeldilik paıda bolady.
— Allergenge tán ımmýnoterapııa «allergııaǵa qarsy vaktsına» sııaqty. Organızm mıkrodozalardyń kómegimen allergenge birtindep úırenedi. Kýrs 3-5 jylǵa sozylady, biraq nátıje oǵan turarlyq: kóptegen naýqasta sımptomdar joǵalady nemese aıtarlyqtaı tómendeıdi.
Eger Sizde jyl saıyn bir ýaqytta «sýyq tııý» bastalsa, dárigerge barýdy keıinge qaldyrmańyz. Óz-ózińizdi emdemeńiz. Tipti muryn tamshylary durys paıdalanbaǵan jaǵdaıda zııan keltirýi múmkin. Úıde kilem, jumsaq oıynshyqtar, eski jıhaz sııaqty «shań tozańdary» joq ekenine kóz jetkizińiz.
Allergııalyq rınıtti emdeýge bolady jáne qajet. Zamanaýı ádister patsıentterdiń kópshiligine tolyqqandy belsendi ómir súrýge múmkindik beredi. Eger Siz nemese balańyz birneshe aptaǵa sozylatyn túsiniksiz muryn bitelýmen zardap shegetin bolsa, bul dárigerge qaralýǵa sebep bolady. Durys dıagnoz ómir sapasyn tolyǵymen ózgerte alady, — delingen DSM habarlamasynda.
Aıta ketelik dárilik zattyń bólshek jáne kóterme saýdada ótkizý úshin shekti baǵalary bekitildi.