Allergııa tuqym qýalaıdy, biraq emdeledi – allergolog
ASTANA. KAZINFORM — Allergııa tuqym qýalaıtyn aýrý bolǵanymen, ony emdeýge bolady. Ol úshin mamandar allergııanyń naqty neden paıda bolǵanyn anyqtap, arnaıy ádis qoldanady. Bul týraly allergolog Nurgúl Ǵanıqyzy Jibek Joly arnasynyń «Búgin LIVE» baǵdarlamasynda aıtty.
– Maýsym aıy bastalǵannan bastap allergııamen aýyratyn adamdar úshin eń qolaısyz kezeńderdiń biri bastalady. Bul ýaqytta kóz jasaýrap, qyshyp, qyzarady, adam jıi túshkiredi. Sonymen qatar muryn bitelip, sý aǵyp, keı jaǵdaılarda jótel men entigý de paıda bolýy múmkin, – dedi maman.
Onyń aıtýynsha, mundaı belgilerdiń negizgi sebebi – ósimdik tozańy.
– Dál osy kezeńde kóptegen ósimdik gúldep, aýaǵa tozań bóledi. Tabıǵat qulpyryp turǵanymen, allergııasy bar adamdar úshin bul ońaı ýaqyt emes. Allergııalyq reaktsııany aǵashtardyń, shópterdiń jáne aramshópterdiń tozańy qozdyrady. Qazaqstanda olardyń ishinde jýsanǵa allergııa eń jıi kezdesedi. Sondyqtan jaz mezgilinde kóptegen adamda allergııa belgileri kúsheıedi, – dedi ol.
Maman allergııa tuqym qýalaıtyn aýrý bolǵanymen, ony emdeýge bolatynyn aıtty.
– Qazirgi tańda allergen-spetsıfıkalyq ımmýnoterapııa dep atalatyn tıimdi emdeý ádisi bar. Bul em Qazaqstanda, onyń ishinde Astana qalasynda da jaqsy jolǵa qoıylǵan jáne oń nátıjesin kórsetip keledi, – dedi Nurgúl Ǵanıqyzy.
Mamannyń sózinshe, emdeý ár naýqasqa jeke shema boıynsha júrgiziledi.
– Mysaly, adamda jýsan tozańyna allergııa bolsa, biz sol allergendi belgili bir mólsherde engizý arqyly aǵzany oǵan birtindep beıimdeımiz. Nátıjesinde allergııalyq reaktsııanyń qarqyndylyǵy tómendeıdi. Alaıda bul em uzaq ýaqytty talap etedi, – dedi ol.
Sondaı-aq em taǵaıyndaý úshin aldymen allergııanyń naqty neden týyndaǵanyn anyqtaý qajet ekenin atap ótti.
– Ol úshin arnaıy dıagnostıka júrgizip, taldaýlar tapsyramyz. Tekserý nátıjelerine súıene otyryp, ár naýqasqa jeke emdeý josparyn quramyz, – dedi allergolog.
Aıta keteıik, Densaýlyq saqtaý mınıstrligi eldegi maýsymdyq allergııanyń eń keń taralǵan sebepteriniń biri – jýsan tozańyna allergııany emdeýge arnalǵan otandyq preparattyń klınıkalyq zertteýiniń II kezeńin bastady.
