Allenbı baqylaý-ótkizý beketinde eki ızraıldik qaza tapty

ASTANA. KAZINFORM — Batys jaǵalaý men Iordanııa shekarasyndaǵy qaıǵyly oqıǵa aımaqtaǵy jaǵdaıdyń ýshyǵyp turǵanyn kórsetedi, dep habarlaıdy Kazinform agenttiginiń menshikti tilshisi.

Izraıldik eki azamat Allenbı baqylaý-ótkizý beketinde shabýyldyń qurbany boldy. Bul ótkel Iordanııada «Hýseın koroli kópiri» dep atalady jáne Iordan ózeniniń Batys jaǵalaýyn Iordanııamen baılanystyrady.

Izraıldiń jedel járdem qyzmeti «Magen Davıd Adom» taratqan málimetke sáıkes, shamamen 60 jáne 20 jastaǵy eki er adam es-tússiz, aýyr jaǵdaıda tabylǵan. Keıin dárigerler olardyń qaıtys bolǵanyn rastady.

Aldyn ala tergeý derekterine qaraǵanda, shabýyl jasaǵan adam Gaza sektoryna gýmanıtarlyq júk alyp bara jatqan júk kóligimen kelgen. Ol adamdarǵa oq atpaq bolǵan, biraq qarýy istemeı qalǵan. Osydan keıin ol qasyndaǵy ızraıldikterge pyshaqpen shabýyl jasaǵan. Ekeýi de aýyr jaralanyp, sol jerde kóz jumǵan.

Bekettegi qaýipsizdik qyzmeti jaýap retinde oq atyp, shabýyldaýshyny óltirdi. Izraıl áskerı ókilderi onyń keıbir BAQ jazǵandaı Iordanııa áskeri qyzmetkeri bolmaǵanyn naqtylady.

— Shabýyl jasaýshy eki ızraıldikke shabýyldaǵannan keıin qaýipsizdik kúshteri ony atyp, zalalsyzdandyrdy, — dep málimdedi Izraıl qorǵanys armııasy.

Amman (Iordanııa astanasy) bul oqıǵa boıynsha jaǵdaıdy baqylap otyrǵanyn rastady. Iordanııa úkimetiniń resmı ókili Muhammad ál-Mýmanı málimdegendeı, quzyrly organdar baılanysta bolyp, oqıǵanyń egjeı-tegjeıin anyqtap jatyr.