Alkogol satýǵa lıtsenzııa berý tolyq avtomattandyryldy – Memlekettik kirister komıteti

ASTANA. KAZINFORM – Elimizde alkogol ónimderin satýǵa beriletin lıtsenzııany avtomatty túrde alýǵa bolady. Tolyǵyraq Qarjy mınıstrligi memlekettik kirister komıteti ákimshilendirý departamenti aktsızderdi ákimshilendirý basqarmasynyń basshysy Erlan Dalbın aıtyp berdi, dep habarlaıdy QazAqparat tilshisi.

«Alkogol jáne temeki ónimderin satýmen aınalysýǵa lıtsenzııalar berý avtomattandyrylǵan. Ony e-gov.kz veb-portal arqyly júzege asyrýǵa bolady. Sonymen qatar artyq talaptardyń joıylǵanyna birneshe jyl boldy. Búginde lıtsenzııa alý ońaı ári qoljetimdi. Sol sııaqty salyq tóleýshi kirister departamenti mamandarymen tikeleı baılanyspaıdy. Bul bir jaǵynan, sybaılas jemqorlyq táýekelderiniń aldyn alsa, ekinshi jaǵynan, biryńǵaı tártip. Qandaı da bir qujattar bolmaǵan jaǵdaıda júıe avtomatty túrde lıtsenzııa berýden bas tartady», - dedi Erlan Dalbın kirister komıtetiniń YouTube kanalynda ótken tikeleı efır barysynda.

Spıker aıtqandaı, alkogol jáne temeki ónimderin satýǵa lıtsenzııa alý tártibi týraly Memlekettik kirister komıtetiniń resmı saıtynan tabýǵa bolady.

Sondaı-aq, komıtet ókili usynǵan málimet boıynsha, syra jáne etıl spırti men alkogol ónimin satýǵa 3 000 AEK alym, tek syra sýsynyn óndirýge 2 000 AEK qarastyrylǵan.

Alkogol ónimderin kóterme satýǵa lıtsenzııa 200 AEK turady. Aıtýynsha, lıtsenzııalar quny óńirler boıynsha ózgerip otyrady. Atap aıtqanda, Astana jáne respýblıkalyq, oblystyq mańyzy bar qalalarda 100 AEK, aýdandyq mańyzy bar qalalar men kentterde 70 AEK, al aýyldarda 30 AEK alym kózdelgen.

Buǵan deıin elimizde alkogol satýǵa 40 myńǵa jýyq lıtsenzııa berilgeni týraly habarlaǵan edik.