Alkogol ónimderiniń aktsızdik salyǵy 3,1 esege ósedi

ASTANA. 24 qazan. QazAqparat - 2016 jylǵa deıin Qazaqstanda alkogol ónimderiniń aktsızdik salyǵy 3,1 esege ósedi. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken baspasóz máslıhatynda QR Qarjy mınıstrligi salyq komıtetiniń tóraǵasy Ánýar Jumadildaev málim etti.

Komıtet tóraǵasy atap kórsetkenindeı, búginde QR Ekonomıka jáne bıýdjetti josparlaý mınıstrligi alkogol ónimderiniń aktsızdik salyǵyn kóterýdi kózdeıtin arnaıy zań jobasyn ázirlep, Parlament Májilisiniń qaraýyna engizdi. «Oǵan sáıkes 2014 jyly 1 lıtr ishimdik úshin myń teńge, 2015 jylda - 1200 teńge, al 2016 jyly 1600 teńgege deıin kóterý kózdelgen. Sóıtip, 3 jyldan keıin alkogol ónimderiniń aktsızdik salyǵy 3,1 esege ósedi», - dep atap kórsetti Á. Jumadildaev.