Alkogol ónimderin shyǵarýmen aınalysqan shymkenttik eki turǵynǵa sot úkimi shyqty
Shymkent qalasynyń eki turǵyny jasyryn túrde alkogol ónimderin shyǵarýmen aınalysyp kelgen. Olar «Ońtústik» ındýstrıaldy aımaǵyndaǵy tsehty jáne qaladaǵy Qurban ata kóshesinde ornalasqan jer úılerdiń birin jalǵa alǵan. Olar «Rodnaıa step», «Taý Eksklıýzıv», «Rýsskaıa na brýnkah» ataýlaryn paıdalanyp, alkogol ónimderin shyǵarýmen shuǵyldanǵan.
«Shymkent qalasy Ádilet departamentiniń memlekettik sot oryndaýshylary men Ekonomıkalyq tergep-tekserý departamenti qyzmetkerleri birlesip, alkagol ónimderin shyǵarýmen aınalysqan jasyryn tsehtardyń qyzmetin toqtatty. Ol jerden «Rodnaıa step», «Taý Eksklıýzıv», «Rýsskaıa na brýnkah» ónimderiniń 6 041 bos shólmegi, 1200 daıyn ónimderi jáne 18 qorap qaqpaq, 2 tonnaǵa jýyq spırt pen 20 270 dana túrli bos shólmekter joıyldy», - delingen Shymkent qalasy Ádilet departamentiniń baspasóz qyzmeti taratqan habarlamada.