Zańsyz aktsızdik ónim: Memlekettik kirister komıteti tekseris qorytyndysyn jarııalady

ASTANA. KAZINFORM — Memlekettik kirister komıteti aktsızdeletin taýarlardy óndirý, saqtaý, tasymaldaý, satý jáne esepke alý salasyndaǵy zańnamanyń saqtalýyn baqylaýǵa baǵyttalǵan tekserý is-sharalarynyń esebin berdi.  

2024 jyly alkogol ónimderin óndirýshiler tarapynan iri buzýshylyqtar tirkelgen. Olardyń biri — alkogol ónimderin óndirýshi aktsızderden 3 mıllıard teńgeden astam soma jaltarǵan. 

— Qazirgi ýaqytta salyqtyq tekserý júrgizilip jatyr. Osyǵan oraı quqyq buzýshy tolyq kólemde shyǵyndy óteıdi. Sondaı-aq júrgizilgen is-sharalar barysynda memlekettik kirister organdary tenevoı naryqpen kúres aıasynda zańsyz aktsızdik ónimderdi anyqtady, - delingen komıtet habarlamasynda. 

Atap aıtqanda: 

Alkogol: 1,9 mıllıon lıtrden astam zańsyz alkogol ónimderi anyqtalǵan. Bul 2023 jylmen salystyrǵanda úsh ese kóp.

Temeki ónimderi: Tekserý kezinde 116 zańsyz saýda jaǵdaıy tirkelip, 16,6 mıllıonnan astam kontrafaktilik temeki qoraby alyndy. Bul ótken jylmen salystyrǵanda 17%-ǵa kóp. 

Munaı ónimderi: 480 tenevoı janar-jaǵar maı satý jaǵdaıy anyqtalyp, jalpy somasy 7,9 mıllıard teńge bolatyn 34,5 myń tonna munaı ónimi alyndy. Sondaı-aq sot organdary zańsyz áreketterden túsken 591,4 mıllıon teńge tabysty tárkiledi jáne 25,3 mıllıon teńge mólsherinde aıyppul saldy. 

Osylaısha, MKK zańsyz aktsızdik ónim aınalymyna qarsy kúres jalǵasatynyn jáne aktsızdik taýarlardy óndirý men aınalymyn baqylaý tek kúsheıe túsetinin atap ótti. Zań buzýshylyqtar anyqtalǵan jaǵdaıda kináli tulǵalar Qazaqstan Respýblıkasynyń zańnamasyna sáıkes tolyq jaýapkershilikke tartylady. 

Eske sala keteıik, buǵan deıin Memlekettik kirister komıteti mamandary beıneqońyraý arqyly keńes beretinin jazǵan edik.