Alkogol naryǵyndaǵy «kóleńkeli bıznesti» araq zaýyttary jasap otyr - M.Qazbekova
ASTANA. QazAqparat - Alkogol naryǵynda «kóleńkeli bıznesti» zaýyttardyń ózderi jasap otyr. Búgin etıl spırti men alkogol ónimderiniń óndirilýin jáne aınalymyn memlekettik retteýge arnalǵan zań jobasynyń tanystyrylymy barysynda depýtat Merýert Qazbekova osyndaı pikir bildirdi.
Depýtattyń aıtýynsha, resmı málimetter boıynsha Qazaqstanda 30 araq, 17 spırt zaýyty jumys jasasa, sonyń jartysynan astamy ózderin shyǵyndy, zalaldy kásiporyndar retinde kórsetip keledi. Onyń ústine alkogol ónimderiniń «kóleńkeli» aınalymy 60 paıyzdy qurap otyr.
«Qazaqstandaǵy araq zaýyttarynyń basym bóligi 20 jyl boıy zalaldy kásiporyn atalyp júr. Bul qısynsyz. Jalpy Qazaqstandaǵy naryqqa «kóleńkeli» bıznes qaıdan kelip jatyr? Munyń bári sondaı zaýyttarda jasalady, al óndirilgen ónimniń jartysynan astamy zańsyz jolmen saýda sórelerine túsedi», - deıdi depýtat.
Mundaı pikirge depýtat Gúljan Qaraǵusova da qosylady. «Alkogol ónimderin shyǵaratyn kásiporynnyń zalaldy bolýy shynymen de jónsiz. Keńes Odaǵynda rasynda da solaı bolǵan, ol kezde ondaı kásiporyndardy birden jaýyp tastaıtyn. Al bizdegi jaǵdaıǵa qarasaq, 20 jyl boıy zalaldy sanalyp kelgen araq zaýyttary eshteńe bolmastan jumys jasap keledi», - deıdi halyq qalaýlysy.
