Alkogoldi ónimniń «kóleńkeli» bıznesi jarty jylda Astanaǵa 1,8 mln. teńge zalal keltirdi - Astana qalalyq Qarjy polıtsııasy
ASTANA. Tamyzdyń 13-i. QazAqparat /Jasulan Amanbaıuly/ - Bıylǵy jyldyń alty aıynda alkogoldi ónimniń «kóleńkeli» bıznesinen Astananyń bıýdjet qorjynyna 1 mln. 816 myń teńge zalal keltirildi.
Bul týraly búgin brıfıng barysynda Astana qalasy boıynsha Ekonomıkalyq qylmysqa jáne sybaılas jemqorlyqqa qarsy kúres departamentiniń (Qarjy polıtsııasy) baspasóz hatshysy Tolqyn Nábıeva málim etti.
Onyń aıtýynsha, qazirgi ýaqytta alkogoldi ishimdikterdiń zańsyz aınalymy boıynsha 8 qylmystyq is qozǵaldy.
«Jalpy shyǵyn kólemi 1 mln. 816 myń teńgeni qurady. Onyń ishinde 942 myń teńgeniń orny toltyrylǵan. Tárkilengen alkogoldi ónimderdiń jalpy quny 550 myńnan astam teńgeni qurap otyr», dedi ol.
T. Nábıevanyń atap kórsetkenindeı, osy qylmysqa barǵan azamattarǵa qatysty sot tek aıyppul salý sheshimin ǵana shyǵara alady.
Máselen, onyń aıtýynsha, «jalpy somasy 246 myńnan asatyn alkogoldi ishimdikterdi qala dúkenderine tıisti ruqsattama qaǵazynsyz satyp kelgen Júnisova degen kásipkerge 145 myń teńge aıyppul salynǵan».
