«Alqaptan ústelge deıin»: Ósimdik sharýashylyǵynyń jańa aqparattyq júıesi engizilmek
ASTANA. KAZINFORM – Elimizde ósimdik sharýashylyǵyn qadaǵalaýdyń jańa aqparattyq júıesi synaqtan ótkizilip jatyr. Jobany qoldanysqa engizý úshin 714 mln teńge qarjy qajet. Bul týraly Úkimet otyrysynda QR AShM basshysy Aıdarbek Saparov aıtty.
— Qazirgi qoldanystaǵy ósimdik sharýashylyǵy ónimderin qadaǵalaý júıesi tek taýarlarǵa ilespe qujattardy berý kezinde týyndaıdy. Bul osy júıede tolyq qadaǵalaýdy qamtymaıdy. Jańa tsıfrlyq júıe ósimdik sharýashylyǵyndaǵy óndiris tsıklin «alqaptan ústelge deıin» tolyq qamtyp, óndirilgen ónimdi ótkizý protsesterin baqylaý men qaýipsizdigin qamtamasyz etýge úlken múmkindik beredi, - dedi ol.
Sondaı-aq mınıstr ósimdik sharýashylyǵy obektilerinde egis alqaptaryn, tarıhı derekterdi, aýyspaly egisti, ortasha ónimdilikti, saqtaý kólemin pasporttaýdy engizý josparlanyp otyrǵanyn aıtty. Bul ónimniń shyǵý teginiń ashyqtyǵyn qamtamasyz etedi.
— Atalǵan júıe 2025 jyldan bastap Aqmola oblysynda tehnıkalyq synaqtan ótýde. Júıeniń ınvestıtsııalyq jobasy Tsıfrlandyrý mınıstrligimen kelisildi. Júıeni tolyqqandy iske qosý úshin 714 mln. teńgeni qajet etýde. Osyǵan baılanysty Oljas Abaıuly, Úkimetten osy júıeni iske asyrý úshin Mınıstrlikke qosymsha qarajat bólý máselesin qoldaýdy suraımyn, - dedi Aıdarbek Saparov.
Aıta keteıik, elimizde bıdaı egý azaıyp, rentabeldiligi joǵary daqyldar aýmaǵy arttyrylyp jatyr.
Sondaı-aq aýyl sharýashylyǵy kásipkerlerine jeńildetilgen lızıngke qarjy bólý qashan bastalatynyn jazǵan edik.