Alqabılerdiń qatysýymen ótedi: Bıshimbaevtyń basty soty 27 naýryzǵa belgilendi
ASTANA. KAZINFORM – Búgin Astana qalasy Qylmystyq ister jónindegi mamandandyrylǵan aýdanaralyq sotynda burynǵy Ulttyq ekonomıka mınıstri Qýandyq Bıshimbaevtyń isine qatysty aldyn ala tyńdaý aıaqtaldy. Sot zalyna BAQ ókilderi búgin de jiberilmeı, onlaın qatysty.
«QR Qylmystyq kodekstiń 110-baby 2-bóliginiń 1-tarmaǵynda jáne 99-baby 2-bóliginiń 5-tarmaǵyna sáıkes qylmystyq quqyq buzýshylyq jasady dep aıyptalǵan Q. Bıshimbaevqa qatysty qylmystyq is boıynsha bas sot talqylaýy taǵaıyndaldy. Basty sot otyrysy 2024 jylǵy 27 naýryzda saǵat 10:00-de Astana qalasy, Kenesary kóshesi, 3 mekenjaıynda alqabılerdiń qatysýymen ótedi», - dedi sýdıa Aıjan Qulbaeva sheshimdi oqı otyryp.
Sondaı-aq, sýdıa QR Qylmystyq-protsestik kodekstiń 320, 321-baptaryn basshylyqqa ala otyryp, kúdikti Q. Bıshimbaev pen B. Baıjanovtyń qorǵaýshylarynyń ótinishin qanaǵattandyrýdan bas tartty.
«Prokýrorǵa aıyptaý aktisiniń kóshirmesin sottalýshynyń qorǵaýshylaryna tapsyrý mindetteledi. QR Qylmystyq kodekstiń 110-babynyń 2-tarmaǵynyń 1-tarmaǵynda, 99-babynyń 2-tarmaǵynyń 5-tarmaǵyna sáıkes qylmystyq quqyq buzýshylyq jasady dep aıyptalýshynyń Q. Bıshimbaevqa qatysty jáne QR Qylmystyq kodekstiń 432, 434-baptarynda kózdelgen qylmystyq quqyq buzýshylyqtar jasady dep aıyptalýshynyń B. Baıjanovqa qatysty basty sot otyrysynda aýdıo jáne beınejazba quraldary qoldanylady», - deıdi ol.
Odan bólek, sýdıa A. Qulbaeva basty sot otyrysyna alqabılerdiń biryńǵaı tiziminen 300 kandıdatty shaqyrýdy talap etti. Sot isi orys tilinde júredi.
«Sottalýshynyń qamaýda ustaý túrindegi bultartpaý sharasy saqtalsyn, isti sotta qaraý kezeńine arnalǵan merzim is sotqa kelip túsken kúnnen bastap 6 aıǵa deıin uzartylsyn. Qaýly túpkilikti, shaǵymdanýǵa jáne narazylyq bildirýge jatpaıdy», - dep tolyqtyrdy sýdıa.
Aıta keteıik, keshe Astanada Qýandyq Bıshimbaevtyń isi boıynsha aldyn ala tyńdaý bastaldy. Sot zalyna jýrnalıster tikeleı qatysa almady, BAQ ókilderi úshin bólek zalda tikeleı kórsetilim uıymdastyryldy. Eks-sheneýniktiń isine qatysty aldyn ala tyńdaýǵa 80-ge jýyq BAQ ókili qatysty.
Aldyn ala tyńdaý barysynda Prokýror eks-sheneýnik Qýandyq Bıshimbaevqa qatysty istiń mán-jaıymen tanystyrdy.
