Alqabılerdiń qatysýymen qaralatyn ister sanaty keńeıedi - Senat

ASTANA. QazAqparat - Senat spıkeri Máýlen Áshimbaevtyń tóraǵalyǵymen palata bıýrosynyń otyrysy ótti. Onda bıýro músheleri 2022 jylǵy 15 jeltoqsanda ótetin Senat otyrysynyń kún tártibin belgiledi, dep habarlaıdy QazAqparat.

Aldaǵy beısenbide senatorlar «Qazaqstan Respýblıkasynyń Úkimeti men Ózbekstan Respýblıkasynyń Úkimeti arasyndaǵy tótenshe jaǵdaılardyń aldyn alý jáne olardy joıý salasyndaǵy yntymaqtastyq týraly kelisimdi ratıfıkatsııalaý týraly» jáne «Qazaqstan Respýblıkasynyń Úkimeti men Túrikmenstannyń Úkimeti arasyndaǵy Azamattyq qorǵanys, tótenshe jaǵdaılardyń aldyn alý jáne olardy joıý salasyndaǵy yntymaqtastyq týraly kelisimdi ratıfıkatsııalaý týraly» zań jobalaryn qaraıdy.

Bul zań jobalaryn qabyldaý arqyly taraptardyń quzyretti organdary arasyndaǵy ózara is-qımyldy qamtamasyz etýge, tótenshe jaǵdaılardy boljaý salasynda tájirıbe almasýǵa jáne tarap-memleketterdiń oqý oryndarynda azamattyq qorǵaý salasynda maman daıarlaýǵa múmkindik týady. Sondaı-aq jańa normalar tótenshe jaǵdaılardyń aldyn alýǵa, týyndaýyna, olardy joıýǵa qatysty aqparat almasýǵa jáne suraý salý boıynsha taraptardyń aýmaǵynda tótenshe jaǵdaılardy joıý kezinde kómek berýge jol ashady.

Sonymen qatar Senat depýtattary palata otyrysynda «Qazaqstan Respýblıkasynyń Úkimeti men Birikken Arab Ámirlikteriniń Úkimeti arasyndaǵy ınvestıtsııalardy kótermeleý jáne ózara qorǵaý týraly kelisimdi ratıfıkatsııalaý týraly» zań jobasyn qaraıdy. Qujat ınvestıtsııalyq qyzmetti júzege asyrý úshin ınvestorlar quqyqtarynyń kepildikterin bekitý arqyly yntymaqtastyq arttyrýdyń quqyqtyq negizderi qalyptastyrýdy kózdeıdi. Odan bólek, zań jobasynda ınvestıtsııalyq ahýaldy jaqsartýǵa jáne elder arasyndaǵy ózara tıimdi saýda-ekonomıkalyq yntymaqtastyqty odan ári damytýǵa yqpal etetin normalar bar.

Senat otyrysynyń kún tártibine engizilgen kelesi másele - «Qazaqstan Respýblıkasynyń Qylmystyq-protsestik kodeksine sot alqabılerdiń qatysýymen qaraıtyn ister sanattaryn keńeıtý boıynsha ózgerister engizý týraly» zań jobasy. Bul qujat 2024 jylǵy 1 qańtardan bastap taǵy 13 qylmys quramyn alqabılerge berýdi kózdeıdi.

Sondaı-aq Bıýro otyrysynda Májilisten kelip túsken zań jobalary Senattyń turaqty komıtetterine bólinip berildi.

Foto: senate.parlam.kz