Alqabıler soty qandaı isterdi qaramaıdy

ASTANA. KAZINFORM – QR Joǵarǵy soty sot protsesine qatysý úshin alqabılerdi irikteýdiń mán-jaıy týraly túsinik berdi.

«Olardyń jeke basyn jarııalamaý mańyzdy. Sondyqtan alqabıler alqasyna kandıdattardy irikteý mindetti túrde jabyq sot otyrysynda ótýi kerek, al isti qaraý kezinde alqabılerdi túsirýge tyıym salynady», - delingen Joǵarǵy sottyń Kazinform agenttigine bergen jaýabynda.

Sonymen qatar, alqabıler sotynda qylmystyq toptyń áreketteri, ekstremıstik nemese terrorıstik qylmystar týraly ister qaralmaıtyny habarlandy.

«Bul tyıym alqabılerge bolýy múmkin qysymǵa tosqaýyl qoıý úshin engizildi. Óıtkeni, qylmystyq top músheleriniń sany aıtarlyqtaı kóp bolýy múmkin jáne is qaralǵan kezde barlyq qatysy bar adamdar ustalmaýy yqtımal», - dep atalyp ótken Joǵarǵy sot aqparatynda.

Budan buryn habarlanǵandaı, burynǵy Ulttyq ekonomıka mınıstri Qýandyq Bıshimbaevtyń isine qatysty sot 27 naýryzǵa belgilendi. 

Bul rette, elordanyń Qylmystyq ister jónindegi mamandandyrylǵan aýdanaralyq sotynda Q.Bıshimbaevtyń isi boıynsha alqabılerdi irikteý ótti.