Alqa bıler sotyna balama joq - Djohar Ótebekov
ASTANA. QazAqparat - Elordada «Qazaqstandaǵy qylmystyq protsesterdi jańǵyrtýdyń ózekti máseleleri» taqyrybynda ótken dóńgelek ústelde Almaty qalalyq advokattar alqasynyń múshesi Djohar Ótebekov quqyq qorǵaý salasyna engizilgeli jatqan ózgeristerge qatysty pikirin bildirdi, dep habarlaıdy «QazAqparat» HAA tilshisi.
Dóńgelek ústel barysynda jábirlenýshiler, kúdiktiler men aıyptalýshylardyń quqyqtyq kózqarasy turǵysynda quqyq qorǵaý salasynyń jumys negizindegi zań jobasy talqylandy. Jıynda sóz sóılegen advokat Djohar Ótebekovtyń aıtýyna qaraǵanda sot isterinde alqa bılerdiń kóptep qatysýyn qamtamasyz etý aqtalý úkimderiniń artýyna muryndyq bolady.
«Bul qadam óz tarapynan tergeýge qatysýshylardyń yntasyn oıatyp, sýdıalarǵa batyl bola túsýge jol ashady. Álemde polıtsııasy men prokýratýrasy qatelik jasamaıtyn birde-bir memleket joq. Aqtaý úkimderiniń árqaısysynda bizdegideı prokýrordy jazalaý orynsyz. Sýdıanyń oı-órisin ózgertýdiń jalǵyz ǵana sheshimi - sot sheshiminiń bir bóligin halyqqa qaldyrý. Al bul turǵyda alqa bılerge júginýden basqa birde-bir el ońtaıly tájirıbe oılap tapqan emes», - deıdi ol.
Belgili zańgerdiń pikirine qulaq assaq, sottardyń áreketi alqa bıler sotyna súıene otyryp, batyl bola túsedi.
Aıta ketsek, quqyq qorǵaý organdarynyń negizderin jańǵyrtý týraly zań jobasy Májilistiń qaraýyna 2017 jyldyń qazan aıynda berilgen. Advokattar, ǵalymdar, memlekettik organdardyń, qoǵamdyq jáne halyqaralyq uıymdardyń ókilderi dóńgelek ústelde qylmystyq ádil sot salasynda áreket etetin barlyq adamdarǵa qylmystyq protsestiń kezekti ózgeristeriniń yqpal etý máselelerin, kútiletin ońdy ózgeristerdi talqylady.
