Álııa Nazarbaeva jańa ekologııalyq uıymnyń prezıdıýmyna jetekshilik etedi
Qaýymdastyq Prezıdıýmyna Qoǵamdyq mańyzdy bastamalardy damytý qorynynyń tóraıymy Álııa Nazarbaeva jetekshilik etedi. Uıym elimizdegi ekologııalyq máselelermen aınalyspaq. Qaýymdastyqtyń qamqorshylyq keńesine «jasyl ekonomıka» baǵyty boıynsha Nobel syılyǵynyń laýreaty, jasyldaný tujyrymdamasynyń avtory Rae Kvon Chýng enip otyr.
Qazaqstannyń ekologııalyq uıymdary qaýymdastyǵynyń Basqarma tóraıymy Aıgúl Solovevanyń aıtýynsha, Ekologııalyq uıymdar qaýymdastyǵynyń aldyna birsypyra maqsat qoıylǵan. Atap aıtqanda, tyń uıym ekologııalyq bastamalardy qurý, halyqaralyq seriktestikti damytý, ınvestıtsııa tartý, halyqaralyq jobalar men baǵdarlamalarǵa qatysý, «Jasyl» tehnologııany engizý, qalalardaǵy ekologııalyq ınfraqurylymdardy damytý jáne QR ekologııalyq zańnamasyn jetildirý boıynsha máselelerimen aınalyspaq.
«Qazaqstan qorshaǵan ortany qorǵaý baǵytynda halyqaralyq bastamalarǵa árdaıym ún qosyp keledi. Halyqaralyq kelisimder men mindettemelerdi oryndap qana qoımaı, Qazaqstan ekologııalyq ahýaldy jaqsartý maqsatynda birshama usynystardy bildirdi. Ekologııalyq máselelerge úkimettik emes uıymdarmen birge, kóptegen basqa da uıymdar atsalysýda. Qorshaǵan ortany qorǵaý - ult densaýlyǵynyń máselesi ekenin eskere otyryp, qoǵamnyń barlyq azamattyq uıymdarynyń birigetin kezi keldi degen oıdamyn», - dedi Aıgúl Soloveva Ortalyq kommýnıkatsııalar qyzmetinde ótken jańa Qaýymdastyqtyń tanystyrylymy barysynda.
Qazirgi tańda Din isteri jáne azamattyq qoǵam mınıstrligi bazasynda tirkelgen 3 myńdaı qoǵamdyq qor, odaq, qoǵamdastyq, ortalyqtar men ınstıtýttardyń 8 % ǵana qorshaǵan ortany qorǵaý men «jasyl» tehnologııa salasynda jumys isteıtin kórinedi. Aıgúl Soloveva óz sózinde jeltoqsan aıynda Astana qalasynda qaýymdastyqtyń alǵashqy otyrysy dóńgelek ústel formatynda ótetinin atap ótti. Otyrysta Qazaqstan Respýblıkasy ekologııalyq zańnamasyn jetildirý máseleleri talqylanatyn bolady.
