Álııa Nazarbaeva: «Tomırıs» - eń iri tarıhı kınojobalardyń biri
ASTANA. QazAqparat - Saqtardyń áıgili bıleýshisi Tomırıs patshaıymnyń ómiri men erligin sýretteıtin fılmdi túsirý jumysy naýryzda bastalady, dep habarlaıdy «QazAqparat» HAA tilshisi «Qazaqfılm» kınostýdııasynyń baspasóz qyzmetine silteme jasap.
Sarapshylar keńesi aldynda «Tomırıs» fılmi kórsetilip, onyń nusqasy maquldandy.
Fılmniń óndirisin QR Mádenıet jáne sport mınıstrliginiń tapsyrysy boıynsha Sh.Aımanov atyndaǵy «Qazaqfılm» kınostýdııasy «Sataıfılm» kınokompanııasynyń qatysýymen iske asyrady. Túsirý toby qorǵalym barysynda daıyndyq kezeńinde atqarǵan jumystary týraly aıtyp, ótpeli kezeńniń túsirilimderi, tigilgen kostıýmder, daıyndalǵan rekvızıtter jáne túsirilim alańdary týraly baıandap berdi. Naýryz aıynda fılmniń negizgi túsirý jumystary bastalady.
Kartınanyń bas prodıýseri Álııa Nazarbaeva fılmniń túsirý toby jobany bastaýǵa daıyn ekenin jetkizdi.
«Bul elimizdiń kıno tarıhyndaǵy eń iri tarıhı kınojobalardyń biri. Barlyǵymyz da osy jobaǵa úlken jaýapkershilikpen bar kúshimizdi salyp otyrmyz. Fılm arqyly tarıhymyz tereńnen tartatynyn jáne ata-babalarymyz qalyptastyrǵan salt-dástúrimizdi, mádenıetimiz ben Uly dala rýhyn kórsetip, dúıim kórermenniń kóńilinen shyǵatyn týyndy túsiremiz dep úmittenemin», - deıdi Álııa Nazarbaeva.
Kartınanyń rejısseri Aqan Sataev Tomırıstiń patshaıym bolýy fılmge arqaý bolǵanyn, kınotýyndy Tumardyń dúnıege kelýimen bastalyp, parsynyń áıgili patshasy Kırdiń áskerimen bolǵan, ańyzǵa aınalǵan shaıqaspen aıaqtalatynyn jetkizdi.
«Bizdiń basty maqsatymyz - b.z.d. V-VI ǵasyrlarda Orta Azııany mekendegen, kúndelikti turmys-tirshiligimen, soǵys saıasaty jáne ónerimen álem tarıhynda óz ornyn alǵan, saq, massageter syndy taıpalar qazaq halqynyń arǵy ata-babasy ekenin dáleldeý. Bul fılm qazaq halqynyń mádenıeti men dúnıetanymynyń tamyry tym tereńde jatqanyn dáleldeı túsedi», - deıdi ol.
Sonymen qatar tanymal kınorejısser jınalǵandarǵa túsirilgen keıbir sahnalardy kórsetti. Ol túsirilimderdiń ereksheligi jáne fılmdegi shaıqas kórinisteriniń túsirilimderi qıyn bolatynyn aıtty.
«Fılmniń ótpeli kezeń túsirilimderi byltyr jeltoqsan aıynda Almaty oblysynyń Zarechnyı aýylynyń mańynda júrgizildi. Naýryz aıynyń basynda «Qazaqfılmniń» pavılondarynda túsirý jumystaryn jalǵastyryp, Tomırıs patshaıymnyń dúnıege kelgenin túsiremiz», - dedi rejısser.
Fılmniń túsirý jumystary Jarkent, Shonja, Býrabaı men Baıanaýylda túsiriledi. Jalpy túsirý jumystary tórt aıǵa sozylmaq.
Eske sala ketsek, budan buryn atalǵan týyndynyń rejısseri Aqan Sataev óziniń Instagramdaǵy paraqshasynda Qazaqstanda túsirilip jatqan «Tomırıs» tarıhı fılminde bas keıipkerdi somdaıtyn aktrısanyń esimi anyqtalǵanyn jazǵan bolatyn.
