Álııa Nazarbaeva qorshaǵan ortany qorǵaý salasyndaǵy belsendi jumysy úshin marapattaldy

NUR-SULTAN. QazAqparat - Búgin Ekologııa, geologııa jáne tabıǵı resýrstar mınıstrliginde Ekologter jáne búkilálemdik qorshaǵan ortany qorǵaý kúnine arnalǵan saltanatty is-shara ótti, dep habarlaıdy QazAqparat mınıstrliktiń baspasóz qyzmetine silteme jasap.

Koronavırýs pandemııasyna qatysty eldegi jaǵdaıdy eskere otyryp, aımaqtardaǵy vedomstvolyq baǵynysty uıymdar men aýmaqtyq bólimsheler Zoom platformasy arqyly qosyldy.

Ekologııa mınıstri M. Myrzaǵalıev quttyqtaý sózinde halyqty qorshaǵan ortaǵa uqypty qaraýǵa, tabıǵı resýrstardy tıimdi paıdalanýǵa, flora men faýnanyń biregeı túrlerin saqtaýǵa, ekologııalyq jaýapty sanany qalyptastyrýǵa shaqyrdy.

«Ekologtardyń basty mindeti – bizdiń jerimizdi saqtaý, onyń baılyǵy men urpaqtarymyz úshin qaıtalanbastyǵyn eskerý. Qorshaǵan ortaǵa qamqorlyq – bul bizdiń táýelsiz memleketimizdiń kez kelgen turǵynynyń paryzy. Sizderdi Ekologtar jáne búkilálemdik qorshaǵan ortany qorǵaý kúnimen quttyqtaımyn!», – dedi M. Myrzaǵalıev.

Іs-shara barysynda Batys Qazaqstan oblystyq janýarlar jáne ósimdikter dúnıesi aýmaqtyq ınspektsııasynyń bólim basshysy Serik Májenov qorshaǵan ortany saqtaýǵa úles qosqany, brakonerlikpen kúreskeni úshin Memleket basshysynyń Alǵys hatymen marapattaldy.

Sonymen qatar, qorshaǵan ortany qorǵaý salasyndaǵy belsendi jáne jemisti jumysy, joǵary kásibı qasıetteri men Qazaqstannyń tabıǵı baılyqtaryn saqtaýǵa, qorshaǵan ortany saqtaý men qalpyna keltirýge qosqan jeke úlesi, jańashyldyq pen bastamashylyq, halyq arasynda ekologııalyq qozǵalysty tanymal etý jónindegi jetistikteri úshin «Ekologııa salasynyń úzdigi» tós belgisimen – «Qazaqstannyń ekologııalyq uıymdarynyń qaýymdastyǵy» ZTB Prezıdıýmynyń tóraıymy Álııa Nazarbaeva, Ekologııalyq retteý jáne baqylaý komıtetiniń tóraǵasy Zulfýhar Joldasov, «Qazgıdromettiń» ekologııa departamentiniń dırektory O. Kornıýhova jáne Qaraǵandy oblystyq ekologııa murajaıynyń departamentiniń dırektory D. Kalmykov marapattaldy.

Qoǵamdyq uıymdardyń ókilderi men ekobelsendiler - A.S. Soloveva, S.T. Raqymbekova, E.N. Abaqanov, A. Saharııanovalar qurmet gramotasy jáne alǵys hatpen marapattaldy.

«Qurmetti áriptester, búgin vedomstvalyq marapattarǵa ár salanyń damýyna, ıaǵnı memleketimizdiń damýyna kúndelikti úles qosyp otyrǵan adamdar ıe bolady. Bizben qatar, bizdiń qurmetti ardagerler, qurmetti demalysqa shyqqannan keıin de el ıgiligi úshin eńbek etip júrgenderi qýantady. Jyl saıyn qorshaǵan ortaǵa uqypty qaraýdyń osyndaı laıyqty mysaldary bizde kóp, al marapat árqashan óz batyrlaryn tabady» - dedi ekologııa mınıstri.