Álııa Moldaǵulovanyń týǵanyna 100 jyl tolýyna oraı Aqtóbede «Jas saqshy» synyby ashyldy
AQTÓBE.KAZINFORM – Aqtóbe qalasynyń K.Nokın aýylyndaǵy №65 orta mektepte Keńes Odaǵynyń Batyry Álııa Moldaǵulovanyń esimi berilgen «Jas saqshy» synybynyń saltanatty ashylýy ótti, – dep habarlaıdy ІІM baspasóz qyzmeti.
Bul joba Aqtóbe oblysy Polıtsııa departamentiniń qoldaýymen júzege asyrylyp, óskeleń urpaqtyń azamattyq jaýapkershiligin, quqyqtyq mádenıetin arttyrýǵa jáne quqyq qorǵaý organdaryna degen qyzyǵýshylyǵyn oıatýǵa baǵyttalǵan.
Jańa synypqa oqý úlgerimi, tártibi jáne yntasy joǵary 25 oqýshy iriktelip alyndy. Saltanatty is-sharada arnaıy polıtsııa formasyn kıgen oqýshylarǵa kýálikter tabystalyp, saltanatty túrde ant qabyldady. Іshki ister organdary qyzmetkerleriniń formasyn kııý — bul baǵyttyń mańyzdylyǵy men jaýapkershiligin kórsetedi.
Erlik tarıhqa degen qurmet pen patrıottyq tárbıeniń belgisi retinde Abaı Júsipov mektepke Álııa Moldaǵulovanyń músinin tartý etti. Bul syılyq — Otanǵa adaldyqtyń, batyrlyq pen ádilet jolyndaǵy tabandylyqtyń sımvolyna aınaldy. Mundaı qasıetter bolashaq quqyq qorǵaýshylarǵa tán bolýy tıis.
— Zań men tártip oqýshylarǵa búgin ǵana emes, bolashaq ómirlerinde de serik bolýy qajet, - dedi Abaı Júsipov óz sózinde.
Sondaı-aq Polıtsııa departamenti men mektep arasyndaǵy yntymaqtastyq jáne ózara is-qımyl týraly Memorandýmǵa qol qoıyldy.
«Jas saqshy» jobasy mektep pen polıtsııa arasyndaǵy ózara baılanysty nyǵaıtýǵa, oqýshylardyń kásibı baǵdaryn qalyptastyrýǵa jáne jas urpaqtyń belsendi azamattyq ustanymyn tárbıeleýge baǵyttalǵan.
Aıta keteıik, eki adamdy ajaldan arashalap qalǵan tártip saqshysy marapattaldy.