Álııa Moldaǵulova atyndaǵy Aqtóbe halyqaralyq áýejaıy satylady

AQTÓBE. QazAqparat – Aqtóbedegi halyqaralyq áýejaı satýǵa shyǵaryldy. Alǵashqy quny – 7,3 mıllıard teńge, dep habarlaıdy QazAqparat tilshisi.

2021-2025 jyldary aralyǵynda Aqtóbe oblysynda 23 kommýnaldyq mekeme jekeshelendiriledi.

Onyń 12-si bıylǵa josparlanǵan.

«Jekeshelendiriletin nysandardyń biri - Álııa Moldaǵulova atyndaǵy Aqtóbe halyqaralyq áýejaıy. Qazir quny 7,3 mlrd teńgege baǵalanyp tur. Ony baǵalaý kompanııasy anyqtady. Bári zańǵa sáıkes. Satý-satyp alý elektrondy túrde júrgiziledi. Portal ózi anyqtaıdy», - dedi Aqtóbe oblystyq qarjy basqarmasynyń basshysy Nurlybek Ónerbaev.

Onyń aıtýynsha, 2020 jyly áýejaıdyń tabysy 300 mıllıon teńge bolǵan.

Aıta keteıik, áýejaı 2019 jyly oblys ákimdiginiń menshigine berildi. Bıyl áýejaıǵa Keńes Odaǵynyń batyry Álııa Moldaǵulovanyń aty berildi.