Álııa – qaharmandyq dastany
AQTÓBE. KAZINFORM - Keńes Odaǵynyń Batyry Álııa Moldaǵulovanyń oblystyq memorıaldy mýzeıinde Jeńistiń 80 jyldyǵy men Álııa Moldaǵulovanyń 100 jyldyǵyna arnalǵan «Álııa — qaharmandyq dastany» atty taqyryptyq ekskýrsııa men derekti fılmder kórsetilimi ótti.
Jas urpaqtyń boıynda patrıottyq rýh qalyptastyrý, batyrlardyń ómir jolyn nasıhattaý jáne tarıhı jadyny saqtaý maqsatynda ótkizilgen is-sharaǵa Aqtóbe qalasyndaǵy №21 mamandandyrylǵan gımnazııanyń oqýshylary qatysty.
Qatysýshylarǵa mýzeı qyzmetkerleri Álııa Moldaǵulovanyń ómiri men erligi jaıynda málimetter berdi.
— Álııa týraly qyzyqty málimetter bildim, batyrdyń qaı mektepte oqyǵany, soǵysqa qaı jerden attanǵany, quralaıdy kózge atqan mergen bolǵany, erligi, Otan úshin janyn qıǵany — barlyq málimet óte áserli boldy, batyr apamyzdyń erligi — bizge úlgi, — deıdi atalǵan mekteptiń 5-synyp oqýshysy Hanna Jasqaırat.
Al 8-synypta oqıtyn Batyrhan Seıilhan Álııa mýzeıine buryn da birneshe ret kelgenin, biraq bul joly mýzeı ishi jańaryp, kelýshilerge, ásirese balalar úshin qyzyqty bola túskenin aıtady.
— Álııa mýzeıine kelip, óte erekshe áser aldyq, kóptegen jańa aqparatpen tanystyq. Mýzeıdiń ekspozıtsııa zalynda zamanaýı tehnologııalardy qoldaný arqyly jasalǵan jobalary óte áserli, ásirese Álııanyń týǵan jerine, soǵystaǵy erligine qatysty ekspozııalardy kórgende qııalyńmen sol kezeńderge baryp kelgendeı bolasyń, — deıdi ol.
Oqýshylardy alyp kelgen mektep dırektorynyń tárbıe isi jónindegi orynbasary Gúldana Kolenkına bul is-shara mektep oqýshylary úshin tárbıe saǵatynyń bir bóligi bolǵanyn aıtady.
— Mektebimizde Jeńistiń — 80, Álııa Moldaǵulovanyń 100 jyldyǵyna oraı «Erlik sabaqtary» taqyrybynda tárbıe saǵattary, synyptan tys is-sharalar turaqty uıymdastyrylyp keledi. Osy tárbıe jumystary aıasynda oqýshylar Álııa mýzeıine kelip, batyrdyń ómiri men erligi týraly aqparattarmen tanysyp jatyr. Ótken senbide mýzeıge 2 «B» synyby oqýshylary kelip, Álııanyń týystarymen kezdesti. Mektebimizdiń 2-synyp oqýshysy Qaısar Qudaıbergen «Álııanyń atyn shyǵarǵan tulǵalar» atty ǵylymı joba ázirlep, ǵylymı jobalar baıqaýyna qatysty, — deıdi ol.
Mýzeı dırektory Janar Maqsutova jóndeý júrgizilip, zamanaýı tehnologııamen jabdyqtalǵan mýzeıge kelýshiler qatary 2-3 ese kóbeıgenin aıtady.
— Ásirese oqýshylar, balalar belsendilik tanytýda. Qala turǵyndary, shaharymyzdyń qonaqtary da kún qurǵatpaı kelip jatyr. Mýzeı zalynyń ekspozıtsııasynda qoıylǵan AR-tehnologııa, VR (vıar) kózildirikti mýltımedııalyq tehnologııa, «Vızýalızatsııa», tsıfrlyq storıtellıng, 3D-mapping, Álııanyń hat jazyp otyrǵan gologrammasy, «3D anımatsııa» golografııasyndaǵy vırtýaldy promoýter, 3D formattaǵy relefti karta, vırtýaldy týr, baǵdarlamalyq-ınteraktıvti sensorlyq kıosk kelýshilerge erekshe áser etetini aıqyn, — deıdi ol.
Іs-shara barysynda oqýshylarǵa Álııa Moldaǵulova týraly derekti fılm kórsetildi.