Alysta júrse de, atamekendi umytpaǵan qazaqtar Vashıngtonda bas qosty
ASTANA. KAZINFORM — AQSh-taǵy The Kazakh-American Association uıymynyń Darhan Nurmaǵambetovtiń bastamasymen uıymdastyrylǵan dástúrli tabıǵat aıasyndaǵy kezdesýine qazaq dıasporasynyń ókilderi men AQSh azamattarynan quralǵan júzge jýyq adam qatysty. Bul týraly Kazinform agenttiginiń Vashıngtondaǵy menshikti tilshisi habarlaıdy.
«Bas qosý» pıknıgi Merılend shtatyndaǵy Montgomerı okrýginde ornalasqan Carderock Recreation Area saıabaǵynda ótti. Bul oryn Vashıngtonnan shamamen 10 mınýttyq jerde ornalasqan.
Kórikti tabıǵatymen tanymal saıabaqqa jartasqa órmeleýdi, jaıaý serýendegendi jáne velosıped tebýdi unatatyndar jıi keledi.
The Kazakh-American Association uıymynyń vıtse-prezıdenti Rasýl Eshpaevtyń aıtýynsha, is-sharanyń basty maqsaty — AQSh-ta turatyn qazaqstandyqtardyń basyn qosý.
— Biz óz mádenıetimizdi saǵynamyz. Negizgi maqsatymyz — barlyǵyn bir jerge jınap, Amerıkada bir-birine qoldaý kórsetetin, tanystyq aıasyn keńeıtip, iskerlik baılanys ornatatyn qazaqstandyq úlken qaýymdastyq bar ekenin kórsetý. Osyndaı kezdesýlerdiń arqasynda Amerıkada júrse de, árkim ózin Qazaqstanǵa bir taban jaqyn sezine alady. Mundaı is-sharalardy eń áýeli balalar úshin uıymdastyramyz. Olar óz qurdastarymen tanysyp, mádenıetimizdi tereńirek bilýge múmkindik alady, — dedi Rasýl Eshpaev.
Qazaqstan Respýblıkasy Saýda jáne ıntegratsııa mınıstrliginiń QazTrade saýda saıasatyn damytý ortalyǵy AQ-nyń Vashıngtondaǵy ókili Ramazan Slamhanov mundaı kezdesýlerdiń otandastarymyz, balalar jáne jergilikti turǵyndar úshin mańyzy zor ekenin aıtty.
— Barlyǵy keremet ótip jatyr! Bul — bas qosyp, ózińdi úıdegideı sezinýge, dámdi taǵamdardan aýyz tıip, otandastarmen áńgimelesýge berilgen biregeı múmkindik. Mundanyń bári — ózimizdiń adamdar, jaqyn jandar, qazaqstandyqtar. Sonymen qatar balalardyń qazaq tilinde sóıleýine tamasha múmkindik, — dedi Ramazan Slamhanov.
Onyń aıtýyna qaraǵanda, Qazaq-Amerıka qaýymdastyǵy mundaı is-sharalardy jylyna birneshe ret uıymdastyrady. Sonyń arqasynda dıaspora ókilderi bas qosyp, kezdesip, ýaqyttaryn birge qyzyq ótkize alady.
Sondaı-aq Ramazan Slamhanov mundaı kezdesýler amerıkalyqtardy Qazaqstannyń mádenıetimen, salt-dástúrimen jáne ulttyq taǵamdarymen jaqynyraq tanystyrýǵa múmkindik beretinin aıtty.
— Osyndaı is-sharalarǵa amerıkalyq qonaqtardy arnaıy shaqyrsa, jaqsy bolar edi. Bul mádenıetimizdi, ulttyq taǵamdarymyz ben qundylyqtarymyzdy keńinen tanystyrýǵa kómekteser edi, — dedi ol.
Kásipker Djeık Konkol men onyń jubaıy Alýa Konkol bul kezdesýge jyl saıyn qatysýǵa tyrysatynyn aıtty.
— Biz munda jylyna eki ret kelemiz, óıtkeni adamdarmen aralasqandy unatamyz. Bul — dostar tabýǵa, baılanys ornatýǵa óte qolaıly oryn. Osy jyldar ishinde kóp adammen dostasyp kettik. Munda dostarmen kezdesýge, sondaı-aq balalarymnyń anasynyń mádenıetimen tanysýyna tamasha múmkindik bar, — dedi Djeık Konkol.
Onyń aıtýynsha, ol Qazaqstanǵa jeti ret barǵan jáne árdaıym basqa mádenıetterdi zerttep, olar týraly kóbirek bilýge qyzyǵýshylyq tanytqan. Stýdent kezinde Keńes Odaǵynyń tarıhyna qyzyǵyp, qazaq dalasyn kórýdi armandaǵan. Keıin bul armany oryndalǵan.
Djeık Konkol Kókshetaýda, Petropavlda, Býrabaıda, Astanada, Qaraǵandyda jáne Almatyda bolǵan. Onyń súıikti taǵamdary — qazaqsha et pen palaý.
Sondaı-aq ol Qazaqstan halqyn aldaǵy Respýblıka kúnimen quttyqtady.
— Vashıngtonnan barsha Qazaqstan halqyna Respýblıka kúni qutty bolsyn dep, merekeni kóterińki kóńil kúımen atap ótýdi tileımin, — dedi Djeık Konkol.
Qazaq-Amerıka qaýymdastyǵy bul kezdesýdi Naýryz merekesimen qatar jyl saıyn uıymdastyrady. Іs-sharanyń maqsaty — AQSh-ta turatyn qazaqtardy biriktirý, ulttyq mádenıet pen salt-dástúrdi, ana tilin saqtaý, sondaı-aq jańa tanystyqtar ornatyp, otbasylar arasyndaǵy dostyq baılanysty nyǵaıtý.
Eske salaıyq, buǵan deıin Býdapeshtte qazaq dıasporasyna eki eldiń seriktestigi týraly dáris ótkizilgenin jazǵanbyz.
