Alysqa ushady, qysqa jolaqqa qonady: Elge jańa áskerı ushaq keldi
ASTANA. KAZINFORM — Ispanııadan Almaty qalasyna QR Qarýly kúshteriniń Áýe qorǵanysy kúshterine ekinshi aýyr áskerı-kólik Airbus A400M Atlas ushaǵy jetkizildi, dep habarlaıdy Qorǵanys mınıstrliginiń baspasóz qyzmeti.
Mınıstrlik málimetinshe, ekinshi A400M ushaǵynyń kelýi Qazaqstannyń áskerı-kólik avıatsııasynyń múmkindikterin keńeıtedi.
A400M ushaqtary qorǵanys mindetterin oryndaýmen qatar, tótenshe jaǵdaılardyń saldaryn joıý, halyqty evakýatsııalaý jáne gýmanıtarlyq kómek jetkizý maqsatynda da paıdalanylýy múmkin.
Áskerı-kólik avıatsııasyn qoldanýdyń taǵy bir mańyzdy baǵyty qazaqstandyq áskerı qyzmetshilerdiń halyqaralyq bitimgerlik mıssııalarǵa qatysýyn qamtamasyz etý bolmaq. Mundaı sanattaǵy ushaqtardyń bolýy ulttyq bitimgerlik kontıngentti óz kúshimen tasymaldaý múmkindigin keńeıtedi.
Jańa avıatsııalyq tehnıkany paıdalanýǵa qazaqstandyq ekıpajdar men ınjenerlik-tehnıkalyq personal daıyndaldy. Olar Ispanııanyń Sevılıa qalasyndaǵy Airbus oqý ortalyǵynda teorııalyq jáne praktıkalyq daıarlyqtan ótip, áýe kemelerin basqarý, paıdalaný jáne tehnıkalyq qyzmet kórsetý erekshelikterin meńgerdi.
— Airbus A400M áskerı-kólik ushaǵy Qazaqstan, Túrkııa, Germanııa, Malaızııa, Indonezııa, Frantsııa, Ulybrıtanııa, Ispanııa, Belgııa jáne Lıýksembýrgpen qosa, on eldiń qarýly kúshterinde qoldanylady. Bul ushaq aýyr áskerı tehnıkany alys qashyqtyqqa tasymaldaýmen qatar, qysqa ári arnaıy jabyn tóselmegen ushý-qoný jolaqtaryna da qonýǵa múmkindik beredi. Osylaısha, Qazaqstan Qarýly kúshteriniń múmkindikterin keńeıtýge yqpal etedi, — delingen vedomstvo taratqan aqparatta.
Osyǵan deıin elimizde áýejaılar jańǵyrtylyp, ushaqtar parki jańaratynyn jazdyq.
